• Portada
  • >
  • Opinión
  • >
  • Hestories del Coronavirus XV: Llagartos verdis na carretera

Hestories del Coronavirus XV: Llagartos verdis na carretera

  • 9 Abril, 2020

“Nosotros, la Benemérita, nun tenemos miéu a na. Somos comu llagartos verdis na carretera”

Ayeri aparóme la Guardia Civil. Un despliegue impresionante, dignu de mayor criminal o polo menos d’un peliculón: doscientos metros de conos, 5 coches, un fargatáu de picoletos enfocicaos.

Nun actu reflexu repaso tola mio vida, por ver si tenien daqué por que tar buscándome… non, nun trafico con drogues, nun mate a naide, nun llevo esplosivos en coche, nin siquier soi un turista entrando en Xixón en plenu andanciu a pasar la selmana santa, soi namás un mélicu yendo a trabayar. Aliendo, esta demostración de fuercia nun va por mi.

Avéraseme un Guardia Civil al coche y faigo por contener la perceguera. Vien ensin mazcarina nin guantes, pero colos pulgares convenientemente encaxaos nel cinchu’l pantalón y la pipa asomando, eso si, que nun dexa de ser proteición. Nun-y doi tiempu a decime na, namás que s’avera, suelto-ylo, pero bueno home, comu andais entá asina a estos altores, cola que ta cayendo, u’l material de proteición.

Una sorrisa estelada alluma’l so rostru, entantu mira l’horizonte con xeitu de superheroe de serie B.

– Nosotros, la Benemérita, nun tenemos miéu a na – suéltame tou gallu- Somos comu los llagartos verdis de la carretera, aguantámoslo too. Depués si, llegamos a casa y péganos la muyer, comu a toos, pero bueno…- vaya por dios, tocóme’l campechanu.

– Non, si nun lo dicía por vusté, dicíalo por mi.

Silenciu criminal el restu’l control.

Podemos tar tranquilos, les fuercies de seguridá del estáu español siguin col so trabayu de tresmisión vírica. Tamos a salvu.

Eso si, nun podré volver a ver un llagartu ensin respigame.

 

 

Nun vos perdais Hestories del Coronavirus I, II, III, IV, V, VI, VII , VIII … XII, XIII y XIV

Llucía F. Marqués

 

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies