• Portada
  • >
  • Opinión
  • >
  • Hestories del Coronavirus IV: la paradoxa del “homeschooling” dirixíu

Hestories del Coronavirus IV: la paradoxa del “homeschooling” dirixíu

  • 16 Marzu, 2020

Son más de les 6 de la tardi, pero tengo esculpia pa espublizar tan sero esti artículu, comu vereis sigún vaigais lleendo; la lloxística complícase cuando los medios de produción son llendaos y la demanda de los mesmos se triplica

7’30 de la mañán. Suena l’alarma. Da gustu lo descansá qu’esconsoña una depués d’un díe enteru en casa. Bueno, nun pasa na, puedo permitime un ratín más anantes de llevantame.

8’30 val, ya nun hai esculpia, hora d’esconsoñar. Primer café de la mañana y primer sospresa. La cai suena como un díe d’escuela. Quiero dicir, qu’hai coches y voces de rapacinos y ruedes de cabás rodando pela cera. Reviso’l teléfono, por si mientres durmía camudaren les circustancies, pero aparentemente non, siguimos confinaos y la reciella, mui especialmente, nun pue salir de casa.

Asomá a la ventana, café en man, la primer má cola que crucio la vista tarázame cola mirada, anantes de baxar la tiesta con xeitu pente culpable y desafiante. La segunda escuende’l focicu nuna bufanda a toes lluces innecesaria y tira de la manga d’un rapacín de non más de 10 años al que guia, en direición contraria al cole, a un destín inciertu. La tercera ye conocía.

– Crei que nun había cole -acerté a comentar.

-Y nun lu hai, lo que hai ye trabayu. -a estos altores convién desplicar que vivo nun entesuelu, lo que me da la ventaxa de conversar con transeuntes dende una distancia de seguridá de cuasi dos metros- Llévolu colos güelos, a ver sinón qu’esperen que faiga con él.

Y coles mesmes tira p’alantre.

Mal asuntu.

10: 00 – Fechu parte del mio trabayu, esconsoño a la reciella. Faigolo afalá pol carrapotáu de mensaxes educativos que recibo por estremaos medios, xusto ye destacar l’enfotu de los docentes. Entama’l homeschooling.

Buceando pente los 17 mails que recibo yo y los otros 6 que reciben los mayores alcontramos un mensaxe d’ánimu del direutor, cinco resúmenes con istruciones de les respeutives tutores, una nota al traviés del tokkapp por cada profesor del istitutu afalando a los rapacinos a mirar, na so cuenta privada d’educastur, la respeutiva xera del díe, dos mensaxes de la profe del piqueñu tratando de mandar los deberes, doscientos mensaxes ofendios de wasap de mas que nun recibieron el pdf y un tercer mail con, por fin, l’archivu alxuntu. El profesor de Literacy (forma guai de llamar a l’asignatura d’inglés) informa de que mandará otru mail a lo llargo la mañana, con pistes sobre comu facer l’exerciciu númberu cinco.

Nun somos ricos, pesi a lo que puea paecer, asina que cuntamos con un ordenador -portatil- pa facer los deberes telemáticos de 3 escolinos ya’l teletrabayu de la ma (ya dixe que diba quedar desplicáu’l retrasu d’esti artículu). La cosa ta complicao.

11:00 – Por fin conseguimos organizar turnos, entesacar los deberes d’ente tola mensaxería y repartir espacios.

Al piqueñu manden-y estudiar los temes que nun dieron en clas, facer esquemes ya exercicios más un total de siete trabayos d’investigación con power point y murales pa estos cinco díes. Entendeime, nun hai naide más fan de los trabayos d’investigación que yo, pero compliquen un güevu el repartu d’ordenaor, y no que cinca a los murales… nun se me ocurrió incluyir siete cartulines na llista compres de supervivencia… Darréu torna a ferver el wasap.

Pente toles mas decidimos que se pue escoyer pente tres opciones: mercar el material per interné y que nos lu traigan a domiciliu, porque les llibreries tan presllaes al nun ser de primer necesidá, fabricar cartulina reciclando papel con unos tutoriales mui afayaizos y una batidora o entregar los murales en papel hixénicu. Posponemos la decisión al die viniente.

A la mediana quedóse-y media maleta na taquilla del isti, neto que la llibreta onde apunta les claves d’educastur, ensin les que nun puede aceder a los deberes nin a los enllaces de la plataforma informática cola que trabayen. El xueves nun sabien que dibemos tar empresllaos, asina que nun lo traxo, ya’l vienres dixéronmos que fueremos el llunes a buscalo, pero güei ta trancao. Conseguimos parte de los deberes a base de llamar a compañeros y contactamos con un profesor que se comprometió a unvianos les claves; 6 hores depués siguimos esperando.

Al mayor, pente otres munches coses, manden-y un trabayu de diseñu con un programa que nun teo. Pa cuando conseguimos onde lu descargar, nun cabe nel ordenador y teo de lliberar espaciu a base de pasar a llápices de memoria los mios archivos. Entantu, elli desplica al piqueñu les lleciones y la cosa va avanzando. Menos mal que teo apoyu lloxísticu.

14:30 – Damos por finalizao la xornada escolar, a falta de les manualidaes y de consiguir les claves pa facer los deberes que van por interné.

Nun pueo dexar de pensar nes families ensin ordenador, o ensin interné, o ensin mas y hermanos mayores que puean desplicar les lleciones, los que tienen a los pas trabayando o, en resume, los neños que por uno o por otro nun cuenten con quien los guíe per esti llaberintu.

Coméntolo con una collacia -por teléfono, naide s’alarme, nun francí l’aisllamientu- que tien los rapacinos estudiando nun priváu.

– Vaya mañanina, eh, col homeschooling.

– Bah, nun foi pa tanto. Siguieron les clases na tablet del colexu y pa facer los deberes tienen contautu col tutor fasta les cincu. Nin m’enteré de que taben en casa.

Ye que la educación pública ye lo meyor qu’hai ¿eh? igualito que na privada.

 

P.D. 18:50. Sigo intentando subir l’artículu. Escaecióseme comentalo, les redes tan saturaes y l’interné va a cuentagotes. Yupi.

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies