«La ignorancia xenera mieu; el mieu xenera odiu, y l’odiu xenera violencia»
Del facebook d’Ignacio Bujanda de la Fuente
La ultradrecha volvió facelo. Echó-y un pulsu a les Alministraciones Públiques y ganó. Tanto’l Principáu d’Asturies como’l Conceyu de Xixón rindiéronse al rellatu que ta imponiendo la ultradrecha: que les persones probes y migrantes son violentes y delincuentes
L’Albergue Covadonga de Xixón, destináu a persones en situación d’ensinllarismu, necesita, ante la próxima reforma del so edificiu, realoxar temporalmente a les persones usuaries nuna nueva ubicación. L’Albergue y el Conceyu de Xixón deciden utilizar les instalaciones del Hogar de San José, n’El Natahoyo.
Unes 400 persones movilícense y, al berru —en referencia a les persones en situación d’ensinllarismu— de «¡Llevái esa mierda d’equí!», exercen una presión que fai que’l Conceyu de Xixón dea marcha atrás. Posteriormente, encarga a una comisión técnica, formada por distintes asociaciones, que busque una solución.
Plantégase como alternativa la Casa del Mar. El 20 d’agostu, otres 400 persones vuelven refugar esa ubicación. ¿Va volver el Conceyu de Xixón a ceder énte les presiones de la ultraderecha?
El casu más recién ye’l del pisu pa menores asitiáu nel Paséu de la Florida. Otra Alministración pública, el Principáu d’Asturies, cede énte los berros de los reaccionarios.
La ultradrecha ta istalando’l rellatu de la ignorancia que produz mieu en persones que namás reciben mensaxes curtios, enllenos de mentires. Como diría’l nuesu sabiu musulmán Averroes: «La ignorancia xenera mieu; el mieu xenera odiu, y l’odiu xenera violencia».
La parte más grave: les Alministraciones Públiques tán cediendo énte les presiones de los reaccionarios, y paez que esto ye namás l’entamu. El mecanismu paez fácil y cenciellu: enllenes les redes sociales de mentires y mieu, axuntes a 400 persones y les istituciones, que tán obligaes a protexer a les persones más vulnerables, reculen.
¿Namás les persones más vulnerables? Lleven tiempu señalando con mentires y con acosu xudicial a determinaos grupos políticos y a los sos representantes.
Esto yá pasó nel pasáu. Hitler yá utilizó esta estratexa: crear una víctima propiciatoria.
Pásovos l’enllaz al monólogu de Burt Lancaster en Vencedores y vencidos, sobre los xuicios de Núremberg, qu’esplica perfectamente cómo la ultraerecha puede llegar al poder.
Les organizaciones d’izquierdes tienen que facer una reflexión fonda sobre la estratexa y la táctica necesaries p’afrontar esti momentu históricu. Y esa reflexión nun puede pasar por culpar al «enemigu internu» nin por siguir repitiendo la mesma cantinela d’insultar al trabayador precariu por votar a la drecha.
Va llegar muncha violencia y nun tamos preparaos p’afrontala.
This work is licensed under a Creative Commons Attribution 4.0 International License.
