• Portada
  • >
  • Opinión
  • >
  • Hestories del Coronavirus II: preparaos pa la invasión

Hestories del Coronavirus II: preparaos pa la invasión

  • 13 Marzu, 2020

Comu vos dicía ayeri en “Coronavirus I, clas de solidaridá aplicada”, les sociedaes queden retrataes poles sos reaciones en casu d’emerxencia. Güei vamos a facer otra piqueña incursión nel ablucante arte de mirase l’embeligu

Bono, pues nun vos voi cuntar lo de les estraescolares que vos prometía ayeri, porque nun hai, nin estra, nin escolares. Enterémonos les families depués d’un llargu pingar de noticies contradictories, wasaps d’entrenadores y AMPAS, mails, notes de prensa nun y otru sen y, finalmente, un avisu al traviés de Tokkapp, la mega aplicación educativa gracies a la que les mas del istitutu podemos saber que’l nuesu retueyu aportó diez menutos sero a la clas de matemátiques, pero nun podemos mandar un avisu al cientru porque la comunicación, en clara metáfora del sistema educativu, ye d’una sola via.

Afortunadamente la tele y, sobre tou, les redes interpersonales fixeron el trabayu d’informar de la suspensión de les clases, porque sinón esta mañana les puertes de coles ya istitutos taríen enllenos de despistaos con cabás. Entantu los wasaps de pas y mas fervíen d’esmolecimientu parental polos llibros abandonaos nes taquilles por mor de la falta previsión, los adolescentes aprofitaron la novedá pa cellebralo en comuña; el teléfonu entamó a runfiar ya en menos d’una hora taben entamaes, que yo supiere, tres quedaes interescolares nes qu’estudiantes d’estremaos cientros acomuñaben gayasperamente cellebrando la so llibertá.

Pero nun yera eso lo que vos quería cuntar, que me despisto. Asina les coses, -y por motivos llaborales, que coste- avereme a tomar unes de sidra a un chigre que nun voi nomar, pol aquel de nun facer proselitismu. Pesi a que’l tema del conceyu yera bien otru foi imposible torgar que l’alderique derivare camín del Covid-19 y les estremaes consecuencies llaborales y familiares del mesmu.

-Pa la hostelería va ser tremendo ¿non? -aprofito pa comentar al camareru, de la que vien con un culín.

-Quita p’allá, ho. Si tengo el comedor enllenu pal sábadu. –nun se si allegrame de que la pasión sidrera sobreviva a los virus o si esmoleceme polo irresponsables que somos. A la fin, yo tamién teo una cena pal sábadu.-  Vienen tres grupos de madrilanos  -continúa, abriéndome los güeyos a la realidá- Ya sabes, reunificación familiar, aprofiten les vacancies sanitares pa visitar a los pas y de pasu, folixa.

Camín de casa y más que na por curiosidá, reviso les espublizaciones de dellos contautos que teo pela capital española. “Que guai, teletrabajo desde la terracita” diz una, con una semeya del so ordenaor nuna plaza atarraquitá de xente. “Volvemos pal pueblu” comenta otra, posando les maletes a la puerte casa; a xulgar pol paisaxe de fondo esta ye de cerca Picos.

Llamo a una collacia, pa que me cunte comu ta la cosa pelos madriles “la xente histérico, bono, ya lleeries la llocura’l papel del vater” diz pente rises, y decido nun y cuntar que’equí pasa lo mesmo “pero ya te cuntaré, que paso el fin de selmana ehí… non, namás el finde, voi llevar los rapacinos colos güelos, que nun teo quien me los curie pa dir a trabayar”.

La prensa tamién recueye la noticia “Esodu d’estudiantes” “los asturianos en Madrí vuelven a casa”. Entiendo la gana volver de los esiliaos, pero venir en bloque d’una ciudá en cuarentena a visitar por quince díes a población más avieyada -y poro en riesgu- del estáu nun m’abulta la meyor forma de frenar la despoblación.

Quédome cola imaxe d’una sorriente muyer que llevanta una taza café delantre una vaca (¿?) “Nos hemos venido a Asturias… aquí ¿quién nos va a contagiar?”.

Pues tú, imbecil, tú.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies