Hestories del Coronavirus VI: fallos de racord

  • 18 Marzu, 2020

Neto que los fallos de racord nes películes -comu l’avión de Gladiator o les cámares nos espeyos- la realidá úfrenos interesantes contrastes que nun sabe un si atribuyir a un fallu del guión o a una mala comprensión de la situación pola nuesa parte

Güei tuvi que facer el mio primer viaxe fuera les llendes de la mio cai dende l’entamu l’aisllamientu. Qu’emoción

Dáme cosa salir, nun creais. Ya non pol virus, que lu teo mui asumíu, sinón poles multes. A la nueche pasó l’helicóteru arrimaín a los edificios, por si organizábemos una folixa secreta o s’entamaba nel barriu una rede de contrabandu y ya pela mañana pasa la patrulla col megáfonu, remembrando que nun se pué salir ensin xustificación, interrogando a los transeuntes y desaniciando conceyos de más d’una persona. Creo qu’incoscientemente vamos asumiendo l’estáu de guerra y nun falta’l chivatu que s’emociona pegando voces “aquel lleva dos hores pasiando al perru” “nun se puen sacar guahes de casa” “Eh, tú, aú vas col pan, que ya vi yo que lo mercare la to muyer pela mañana”; igual ye que mos aburrimos muncho.

Nesta situación, teo la impresión de tar cometiendo un delitu al meter la llave’n coche, col salvoconductu bien a la vista nel asientu l’acompañante, y arrancar. Por suerte, un paséu per Xixón valióme pa ver que m’esmolezo a lo fato, ta too controlaísimo y les cuestiones vitales pa la ciudadanía tan siendo atendies.

Por exemplu, los cristales de los escaparates de les tiendes presllaes tan impecables, gracies a la imprescindible ya abnegao llabor de los emplegaos de les empreses de llimpieza, que consideren oportuno nun aparar estes tan necesaries llabores. Lo mesmo pasa coles fachaes, que tan siendo remozaes y pintaes a conciencia, con especial mención a les obres de La Tabacalera, edificiu al qu’entá nun se sabe que finalidá se-y va dar, pero que ye urxentísimo restaurar. Llamóme l’atención un paisano podando la sebe al par del Molinón, pola cantidá de broza qu’apinaba na cera debía llevar tola mañana; sicasí, nun yera l’únicu xardineru: la estaya completa de curiáu de xardinos del Conceyu Xixón debía tar ayeri na cai, colos sos flamantes uniformes del Ayuntamientu Xixón, segando, llantando, llimpiando’l morgazu y acuriosando les zones verdis de la ciudá. Otros profesionales indispensables que pudi ver foron dos carteros, un ciclista de Glovo*, un repartior de publicidá y tres barrenderos. Por supuestu pente toes estes persones, que realizaben tan imprescindibles llabores, mecios con pasiantes de perros y compraores compulsivos, sumaben un par de guantes y una mazcarina, los del podaor.

Da gustu saber que les empreses, y sobre tou l’Ayuntamientu de Xixón, nun esbardien perres pagando a emplegaos en casa y sobre tou, que tan faciendo tolo posible pa que, los que salgamos d’esta, topemos too rellumante y guapo.

La frutera de la cai, eso si, caltién la so barricada a dos metros de los veceros y les coles del supermercáu caltienen una relixosa distancia de metru y mediu pente persones. A la vuelta párame un municipal a lleéme la cartilla, porque al paecer m’allonxare más de la cuenta pa facer la xera pa la que tinía permisu y taba siendo una irresponsalbe “Los irresponsables como usted nos ponen en riesgo a todos” arrepostió mui dignu, alendándome a dos pasos y perdonándome, magnánimu, la multa por pasame en dos cais del percorríu más curtiu col coche p’aportar a destín. “Esto lo paramos entre todos”.

Seré yo, pero hai daqué nun me cuadra.

Pa más información, Hestories del Coronavirus I,II,III,IV y V.

Llucía F. Marqués

*y por dios, aguantaivos ensin telepizza y caprichos a domiciliu, que los repartiores pásenlo mal, coime.

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies