La llista d’espera quirúrxica suma 2.606 pacientes más qu’hai un añu y la demora media supera los cien díes. El deterioru del accesu a la sanidá pública vuelve poner nel centru l’alderique les polítiques que favorecen el negociu sanitariu priváu.
Asturies preslló setiembre con 25.029 persones na llista d’espera quirúrxica estructural del SESPA: 670 más que n’agostu y 2.606 más que nel mesmu mes de 2025. La demora media xubió de 100,78 a 103,73 díes, mientres la espera máxima rexistrada llegó a los 373 díes, más d’un añu pendiente d’una intervención. Son datos d’Astursalud recoyíos por Europa Press que confirmen l’agravamientu del problema.
La evolución allarga la tendencia que yá espeyaben les llistes d’espera del branu, con más de 23.600 pacientes pendientes d’operación. Dende los 23.633 rexistraos en xunetu hasta los 25.029 de setiembre, la llista medró en 1.396 persones. La respuesta sanitaria sigue alloñándose pa miles de pacientes.
El SESPA destaca que los hospitales públicos realizaron en setiembre 4.537 operaciones programaes y 713 urxentes, 5.250 en total. Tamién señala que les demores medies de los seis procedimientos cubiertos pola llei de garantíes quedaron perbaxo de los 180 díes, mediu añu.
Esti deterioru del accesu a l’atención pública alimenta una desigualdá evidente: quien dispón de recursos pue buscar una consulta, una prueba o una operación na privada; quien nun los tien depende de los tiempos del sistema públicu. Ye’l riesgu d’una sanidá a dos velocidaes que yá taba presente nel alderique sobre l’aumentu de los seguros sanitarios privaos n’Asturies, cuando en 2023 se contabilizaben 171.000 persones aseguraes.
La relación ente les deficiencies públiques y la espansión empresarial tien una espresión concreta nes facilidaes concedíes al proyectu hospitalariu de Quirón, un casu qu’exemplifica comu los conciertos y les derivaciones pueden convertir el presupuestu sanitariu nuna fonte de negociu pa operadores privaos, en cuenta de reforzar los centros y les plantiyes públiques.
La preocupación pola privatización vien de llueñe. Les movilizaciones que reclamaben la disolución de GISPASA yá denunciaben en 2017 una privatización encubierta de servicios y cuestionaben la tresparencia de la xestión.
Nesti contestu, resolver les esperes ensin aumentar la dependencia de la privada esixe que les decisiones presupuestaries refuercen la capacidá propia del sistema públicu. L’accesu a una intervención en tiempu nun pue acabar dependiendo de la cuenta bancaria de cada paciente.
This work is licensed under a Creative Commons Attribution 4.0 International License.
