Hai cuasi 2.100 pacientes más esperando una operación que fai un añu y la demora media supera yá los trés meses, una situación que favorez el desvíu hacia la sanidá privada

Xunetu acabó con 23.633 persones pendientes d’una intervención, 238 más que’n xunu y 2.097 más que fai un añu.

La evolución interañal resulta especialmente significativa. En xunetu de 2025 había 21.536 persones esperando por quirófanu; doce meses dempués son un 9,7% más. Tampoco meyora’l tiempu que pasa hasta la operación: la demora media quedó en 91,41 díes, cinco más que nel mes anterior y frente a los 83,77 díes del añu pasáu.

La llista lleva, amás, dos meses consecutivos xorreciendo. En mayu contabilizábense 22.933 pacientes; en xunu, 23.395; y en xunetu, 23.633. En namás dos meses incorporáronse, por tanto, 700 persones más al saldu pendiente d’intervención, pese a que l’actividá quirúrxica ta ente les más altes de los últimos años.

El detalle de los datos amuesa otra cuestión esmolecedora. Respecto a xunu, hai 517 persones menos nel grupu que lleva esperando menos de 90 díes. Pero aumenten en 507 les que lleven ente trés y seis meses y en 248 les que superen los 180 díes.

Ye dicir, l’aumentu concéntrase precisamente nos periodos d’espera más prolongaos. El Sespa considera que la reducción del primer grupu demuestra que se ta dando prioridá clínica a los casos más urxentes, seique tamién son munches les intervenciones que pasaron de tener un tiempu d’espera curtiu a un llargu, ello ye, nun desapaecen eses esperes, sinón que s’allarguen. 

Xunetu preslló con 120.778 persones esperando una primera consulta hospitalaria y hai 13.266 persones más esperando especialista que fai un añu; la demora media, agora de 102,41 díes, aumentó en 14,47 díes.

Tampoco les prebes diagnóstiques escapen a esta situación. Les cinco principales sumaben 33.309 persones en espera, 1.181 más que’n xunu. Les demores medies son de 41,47 díes pa una colonoscopia, 41,86 pa una mamografía, 56,24 pa una ecografía y 45,47 pa un TAC. La resonancia magnética supera esi nivel y llega a los 65,8 díes.

L’Alministración apunta a trés factores: l’entrada de 5.795 nuevos pacientes na llista —la cifra más alta nun mes de xunetu dende 2019—, la baxada d’actividá propia del periodu vacacional ya’l conflictu llaboral médicu, nel que los sanitarios reclamen condiciones dignes de trabayu pa poder desendolcar el so llabor cola calidá necesaria.

La fuelga tuvo un impactu especialmente fuerte nos programas quirúrxicos estraordinarios de tarde, que cayeron un 62,73% respecto a xunetu de 2025. Estos turnos formen parte del dispositivu que’l Gobiernu utiliza pa intentar recortar les demores acumulaes a costa de subir la carga llaboral a los sanitarios. Pero presentar les cifres únicamente como consecuencia del periodu vacacional o de la fuelga médica ocultaría que les dificultaes de personal y organización vienen de muncho más atrás.

Esti mesmu añu, enfermeres eventuales del Hospital de Cabueñes denunciaben precariedá, contratos curtios y una falta continua de previsión nes carteleres, con cambios de turnu y contratación condicionada poles necesidaes inmediates. La situación llegó a provocar una campaña colectiva de protesta. Enfermeres eventuales de Cabueñes denuncien precariedá llaboral y desdexamientu de la salú pública

El resume ye que la sanidá pública asturiana nun tien capacidá pa cubrir la demanda, un fechu que dende dalgunos sectores comu la organización nacionaliega Andecha Astur  consideren intencionao, col envís de remanar pacientes pa la sanidá privada, fechu que se refuercia col sofitu istitucional a empreses comu la clínica Quirón.

This work is licensed under a Creative Commons Attribution 4.0 International License.