Esta mañana tuvo llugar una concentración reclamando la disolución de GISPASA, Xestión d’Infraestructures Sanitaries, S.A.

Según los convocantes d’esta movilización, GISPASA ye una empresa “pública” rexida con derechu priváu, per  aciu de la que la Conseyería de Sanidá ta privatizando de manera encubierta Servicios Sanitarios y Non Sanitarios pertenecientes al SESPA.

Esta sociedá foi creada pa la costrución de dos nuevos hospitales; HUCA-Uviéu y Álvarez Buylla-Mieres, siendo la responsable de dellos años de retrasos na entrega de les obres y d’emportantes sobrecostos, -nel HUCA casi’l sesenta per cientu del presupuestu anicial-. Sicasí, una vegada remataes estes obres, nun sume del panorama sanitariu asturianu, sinón qu’aumenta’l so pesu dientro’l SESPA, quedándose a xestionar los nuevos hospitales.

Como resultáu d’esta xestión, les contrataciones, compres y llicitación de servicios privaos, pagaos con dineru público, nun son xixilaos polos mecanismos de control propios del sistema públicu, con falta de tresparencia dafechu en diches xestiones, faciéndose amás  cargu de llocales comerciales, cafeteríes, aparcamientos, etc, ensin que tea que dar cuenta de los beneficios derivaos.

Esta situación xenera amás la duplicidá de puestos direutivos y de mandu, y poro de salarios, yá que’l SESPA tien la so propia cadarma d’Alministración y Servicios Xenerales, que son quienes s’encarguen de “les sos” funciones nel restu d’Árees nes qu’inda nun tien presencia GISPASA.

Andecha Ástur alerta del riesgu qu’esta privatización encubierta implica pal caltenimientu d’unos servicios que yá se vieron bien perxudicaos polos recortes y la deficiente alministración de los recursos sanitarios del país. Según pallabres de Dulce Xil, responsable de sanidá d’A.A. “La xestión del Principáu y el so enclín privatizaor ponen en pelligru tantu la calidá como la viabilidá económica d’unos servicios imprescindibles pa la población asturiana”

Por tou ello numberoses persones manifestáronse esta mañana dende los once, delantre de la Xunta Xeneral, col enfotu de faer llegar al Principáu” la so refuga ante la xestión que se ta faciendo de la sanidá pública asturiana.

This work is licensed under a Creative Commons Attribution 4.0 International License.