Concentración delantre del Conceyu de Xixón pa refugar el desvíu de dineru público hacia empreses sanitaries privaes y reclamar inversiones reales nel SESPA. La movilización cuestionó tanto los futuros conciertos y derivaciones como la operación urbanística prevista pa facilitar la construcción del hospital de Quirón nel Nuevu Xixón.

La Plaza Mayor de Xixón volvió convertise ayeri nun espaciu de defensa de los servicios públicos. Convocaes pola Corriente Sindical d’Izquierda (CSI), más d’un centenar de persones concentráronse delantre del Conceyu coincidiendo cola apertura del nuevu hospital priváu de Quirón, una movilización que InfoAsturies yá anunciara esta selmana.

“¿Quies pa Xixón lo d’Ayuso con Quirón?” podía lleese na pancarta principal de la protesta, acompañada de cartelos cola consigna “La sanidá pública nun se vende, deféndese”. Nel trescursu del actu, les intervenciones alertaron de que la llegada d’un nuevu operador priváu nun ye un procesu ayenu al sistema públicu, porque la so rentabilidá dependería en bona midida de los conciertos, les derivaciones de pacientes y otros pagos procedentes del presupuestu sanitariu.

El comunicáu lleíu na concentración dexó claro que la protesta nun cuestiona’l derechu d’una empresa a abrir un centru sanitariu priváu, sinón que l’Alministración-y facilite suelu y recursos públicos. Les persones convocantes sostienen que les parceles escoyíes nel Nuevu Xixón son terrenos municipales dotacionales, reservaos pa biblioteques, parques, colexos, centros de salú y otros servicios pa la ciudadanía.

La operación plantegada inclúi una permuta por dos parceles de Cabueñes necesaries pa la construcción de viales. Según la valoración presentada polos colectivos opositores, Quirón podría facese con unos terrenos que tendríen un valor de mercáu aproximáu de diez millones d’euros entregando otros valoraos en poco más de dos millones. “El negociu ye redondu pa Quirón, pero nefasta pa la ciudadanía”, denunciaron, recordando que’l suelu podría destinase, por exemplu, a un nuevu centru de salú públicu.

Dineru públicu pa fortalecer la pública

La denuncia principal va más allá de la ordenación urbanística. La CSI alvierte de que’l nuevu hospital buscará captar actividá financiada pol SESPA al traviés de derivaciones y conciertos. Cada euro destináu a estos mecanismos, recalcaron, ye un euro que dexa d’invertise na contratación de personal, na atención primaria, na reducción de les llistes d’espera o na modernización de los hospitales públicos.

La movilización produzse nun contestu nel que la privatización sanitaria avanzó de manera notable n’Asturies, al tiempu que’l sistema públicu arrastra problemes de plantiya, esperes y falta d’inversión.

En Xixón, esti contraste resulta especialmente visible. Mentes la iniciativa privada acelera la so implantación, l’ampliación del Hospital de Cabueñes acumula retrasos y les sos profesionales vienen denunciando situaciones como la precariedá de les enfermeres eventuales.

Un espediente que sigue abiertu

La representación xurídica de les partes que recurrieron la operación señaló tamién que les últimes sentencies del Tribunal Superior de Xusticia d’Asturies respétense, pero que l’espediente nun ta termináu. Según la documentación presentada, el Plan Especial sigue oficialmente en tramitación y entá nun consten la desafeutación de los bienes municipales, la formalización de la permuta, la escritura pública nin la solicitú de la licencia d’obres. Tamién siguen abiertes distintes víes de recursu.

La concentración remató con un llamamientu a defender una sanidá pública universal y de calidá. Los convocantes recordaron que, nos momentos más críticos de la pandemia, foi’l sistema públicu’l que garantizó l’atención ensin preguntar pola capacidá económica de cada paciente. Por ello, reclamaron al Gobiernu asturianu y al Conceyu de Xixón que prioricen los recursos, los terrenos y les inversiones destinaes a fortalecer lo común, en cuenta de ponelos al serviciu del beneficiu empresarial.

This work is licensed under a Creative Commons Attribution 4.0 International License.