L’alcalde d’Uviéu, Alfredo Canteli “Banderones”, del PP, evitó condergar  la paliza sufrida por Rubén Rosón y Jorge Fernández y llegó a afirmar de los agresores que «nun creo que seyan tan mala xente». El rexidor cuestionó’l relatu de les víctimes, recuperó un incidente protagonizáu por Rosón años atrás y faló de «casualidá», unes declaraciones que provoquen indignación dempués d’una agresión grabada en vídeo, con insultos homófobos y políticos, saludu nazi y berros d’«Arriba España».

Alfredo Canteli decidió poner duldes sobre la agresión facista sufrida na primer nueche de San Matéu por Rubén Rosón y Jorge Fernández, militantes d’AMA Asturies y voluntarios de Fiestes Populares. Los dos acabaron nel HUCA dempués de ser golpeaos por un grupu d’unos ocho mozos cuando trataron d’impedir que destrozaren la caseta y arrancaren una bandera arcuíris. Les imáxenes de la agresión amuesen golpes y a ún de los participantes faciendo’l saludu nazi, mientres les víctimes denunciaron insultos como «rojos de mierda» y espresiones homófobes antes de que los atacantes marcharen al berru d’«Arriba España».

Sicasí, al ser entrugáu polos fechos, l’alcalde aseguró que namás conocía «lo que diz una parte» y pesi a la esistencia del vidiu, reclamó escuchar la versión de los agresores. Canteli foi más allá y, pese a afirmar que nun los conocía, describiólos como «rapazos mozos» y añadió: «Nun creo que seyan tan mala xente».

El rexidor introduxo amás na so respuesta un episodiu anterior venceyáu a Rubén Rosón, asocedíu años atrás na contorna d’El Campillín, y acompañó la referencia d’un significativu «Qué casualidá».

Les declaraciones contrasten inclusive cola posición qu’había treslladáu dos díes antes el propiu equipu de gobiernu municipal. La conceyala de Festexos, Covadonga Díaz, difundió en nome del Conceyu una condena a «too tipu de violencia» y defendió unes fiestes llibres d’agresiones.

AMA Asturies respondió a Canteli reclamando disculpes públiques y un conceyu urxente col alcalde. El colectivu manifestó la so «incredulidá y vergoña» ante unes pallabres que considera que contribúin a normalizar la violencia y pidió al PP d’Uviéu y al PP d’Asturies que se desmarquen de la posición del rexidor.

La reacción del alcalde produzse, amás, dempués de que miles de persones enllenaren la plaza de la Catedral y percorrieren el centru d’Uviéu pa refugar l’agresión y denunciar la violencia facista, racista y LGTBIfóbica. Los propios Rosón y Fernández apuntaron a los discursos de la extrema drecha como un factor que fai que determinados grupos se sientan cada vegada más impunes.

This work is licensed under a Creative Commons Attribution 4.0 International License.