Dos integrantes d’AMA que taben nun puestu de les Fiestes Populares Uviéu acabaron nel HUCA dempués de ser atacaos por un grupu d’ocho persones cuando trataben d’impedir que-yos arrancaren el faldón arcoíris de la caseta de la plaza de la Catedral. L’episodiu nun apaez aislláu: n’Asturies vienen repitiéndose agresiones d’estrema drecha, al tiempu que discursos racistes, xenófobos y contrarios a los derechos LGTBI ganen presencia y normalidá nel debate institucional.

Imaxe estrayía del vidiu de los fechos

La primer nueche de San Mateo dexó n’Uviéu una escena que debería facer saltar toles alarmes. Dos integrantes de Fiestes Populares fueron agredíos cuando intentaben impedir que un grupu formáu por ocho persones arrancara’l faldón arcoíris de la so caseta na plaza de la Catedral. Los dos tuvieron que ser treslladaos al HUCA, onde se-yos practicaron prebes y ún d’ellos precisó puntos de sutura. Según el testimoniu de les víctimes, los atacantes pronunciaren consignes racistes y xenófobes y abandonaron el llugar al glayíu de «Arriba España».

Los agresores tán venceyaos a ambientes de la ultradrecha. Cabe resaltar que Sonsoles Peralta (VOX Uviéu) señaló el 3 setiembre nes sos redes sociales a esa caseta en concreto. Pela información publicada hasta’l momentu nun consta que se produxeren detenciones.

Namás una selmana antes, Vox Uviéu cargaba públicamente precisamente contra Fiestes Populares porque nel so cartelu apaecíen referencies a Palestina, la pallabra «todes», la bandera trans, l’arcoíris y la oficialidá, elementos que la formación presentó como muestra de que San Mateo taba utilizándose como «plataforma de propaganda política». Dos díes antes de l’agresión, la mesma formación volvía presentar los Puntos Violeta de protección de muyeres en casu d’ataques como «ideoloxía» y reclamaba la so eliminación.

Hai menos de tres meses, un rapaz de 15 años foi agredíu nes fiestes de Cagüeñes por llevar una camiseta cola pallabra Asturies. Según el testimoniu recoyíu entós, un grupu d’alrodiu de quince individuos golpeó al menor con una botella, arrequexólu y amenazólu. Los agresores llevaben camisetes blanques con una bandera española bordada. La violencia física amenorgó cuando supieron que tenía quince años, pero siguieron los insultos y les amenaces.

Aquel casu amosó amás otru elementu clave: la impunidá. Según relató la familia, cuando’l menor acudió a la seguridá del eventu recibió como respuesta que podía tar «inventándoselo» y que nun tenía pruebes.

Tampoco yera un casu ensin precedentes. En 2023, Mariano Suárez relataba una agresión por llevar la camiseta de sofitu a Les 6 de La Suiza.

Una cuenta venceyada al ambiente ultra xixonés llegó a publicar semeyes de persones antifacistes acompañándoles de mensaxes amenazantes hasta que les denuncies consiguieron el so cierre.

Los datos estatales tampoco conviden a minimizar el fenómenu. El Ministeriu del Interior rexistró en 2025 2.417 delitos ya incidentes d’odiu, un 23,6 % más que l’añu anterior y la cifra más alta dende qu’entamó la serie estadística en 2014. Los venceyaos a racismu y xenofobia fueron los más numberosos, con 934 casos, y los delitos d’odiu por ideoloxía medraron un 64 % nun añu.

L’arcoíris que los agresores intentaron arrancar esta nueche tien amás una historia política concreta n’Uviéu. En 2019 Vox yá reclamara que los bancos arcoíris de La Escandalera recuperaren el so color anterior porque consideraba que representaben fines «ideolóxicos y partidistes». El gobiernu municipal acabó retirándolos nel añu 2020.

Seis años dempués, un grupu intenta arrancar físicamente un faldón arcoíris d’una caseta y dos persones acaben nel hospital.

La impunidá nun significa namás que nun haiga conderga judicial. Tamién existe una impunidá social cuando se relativiza una agresión facista como una pelea más; cuando se considera provocación llevar una bandera arcoíris, una camiseta d’Asturies o un símbolu sindical; cuando se pon al mesmu nivel a quien señala colectivos vulnerables y a quien se defende d’esi señalamientu.

La historia reciente d’Asturies obliga a tar alerta. Hai agresiones documentaes, grupos organizaos, amenaces y d’estructures neonazis y hai, paralelamente, una extrema drecha institucional que convirtió en parte del alderique públicu discursos contra la inmigración, los drechos LGTBI, el feminismu la diversidá nacional y llingüística.

This work is licensed under a Creative Commons Attribution 4.0 International License.