El Principáu destina esti añu 111,2 millones d’euros a financiar centros educativos de titularidá privada, dedicando perres públiques a caltener una doble rede clasista en llugar de concentrar los recursos en facer de la educación pública la meyor opción posible.

La enseñanza concertada n’Asturies va recibir en 2026 111,2 millones d’euros de les arques públiques, 3,7 millones más que l’añu anterior, munchos millones al añu dedicaos a sostener centros de titularidá privada, mientres la rede pública sigue acumulando problemes de personal, infracadarmes, places y recursos.

Que l’Alministración emplegue una parte tan importante del presupuestu educativu en financiar una rede privada paralela ye defendio como un mediu de poner al algame de tola población la posibilidá d’escoyer centros, accediendo a una educación teóricamente superior que sinón “sedría esclusiva de determinaos sectores sociales”. El fechu ye que la privada sigue siendo un guetu de families bien, contribuyendo a perpetuar la separación del alumnáu por condiciones socioeconómiques, porque, de fechu, pa estudiar na privada faen falta perres por munchos conciertos que paguemos toos. 

Depués de recibir millones de perres públiques pa ofrecer una enseñanza de baldre, la gran mayoría d’estos centros faen cobros a les families -que la llei prohibe-, antroxaos d’aportaciones voluntaries pero que son imprescindibles pa seguir nel centru. 

Nun hai a esi respectu dengún vacíu llegal. L’artículu 88 de la Llei Orgánica d’Educación ye meridianamente claru: los centros públicos y privaos concertaos nun pueden cobrar a les families poles enseñances de carácter gratuitu, nin obligales a facer aportaciones a fundaciones o asociaciones, nin imponer servicios de pagu venceyaos a esa enseñanza.

Una cuota nun ye voluntaria porque nel papel ponga «aportación voluntaria». Si se-y reclama repetidamente a una familia, si’l neñu o la neña recibe un tratu diferente porque los pas nun paguen o si se monta la actividá escolar de manera que pagar se convierta na única opción razonable, la voluntariedá ye una ficción.

Y cuando’l pagu ye realmente obligatoriu sobre una enseñanza que tien de ser de baldre pa les families porque ya lo pagó l’Alministración, el cobru ye illegal.

Si un centru recibe dineru públicu precisamente pa garantizar l’enseñu de baldre y depués consigue que les families paguen otra vuelta por esi mesmu serviciu, ta cobrándose dos vegaes: primero al conxuntu de la ciudadanía al traviés de los impuestos y depués directamente a les families, lo que ye una vulneración del principiu sobre’l que se xustifica’l conciertu y devuelve a la privada al status d’esclusiva pa les clases más altes.

El propiu réxime de conciertos esiste porque l’Estáu decidió financiar centros privaos pa que puedan impartir de baldre determinaes enseñances. Esa gratuidad ye la condición básica pa recibir dineru públicu.

El X Estudiu de Cuotes y Precios de Colexos Concertaos, correspondiente al cursu 2025-2026 y realizáu sobre 338 centros del Estáu, detectó una cuota base nel 83% de los centros analizaos. N’Asturies una investigación publicada esti mes intentó recabar información de cuatro centros concertaos asturianos sobre aportaciones, llibros, uniformes, dispositivos, actividaes y otros gastos, pero los centros consultaos nun facilitaron esa información.

El contraste ye especialmente obscenu cuando se mira la situación de la rede pública.

Hai 221 families ensin plaza nes escuelines de Siero, profesoráu que denuncia caos y falta de medios na implantación de la nueva Formación Profesional y docentes d’asturianu que tuvieron que llegar a enzarrase na propia Conseyería d’Educación pa reclamar derechos básicos.

L’alderique nun ta namás na illegalidá sinon nel fecu de que  l’Alministración favorez la privatización d’un serviciu básicu entregando dineru de toos a una rede educativa de titularidá privada envede reforzar hasta’l máximu una rede pública común, suficientemente dotada y de calidá.

La mesma llóxica de mercantilización que güei vemos avanzar cola espansión de les universidaes privaes n’Asturies lleva décades normalizándose nos niveles básicos de la educación. La consecuencia ye una doble rede que nun parte de condiciones iguales y que permite, na práctica, mecanismos de selección social que difícilmente tienen cabida nuna escuela pública concebida como serviciu universal.

La iniciativa parlamentaria ta en que’l Principáu informe meyor a les families sobre estos drechos, ensin reclamar nada a los centros nin cortar la illegalidá. Señores, eses families ya saben que paguen y que lo faen por estremar a los sos fios d’aquellos que nun pueden pagar. Esa nun ye la cuestión.

La cuestión ye inspeccionar los centros, detectar los cobros obligaos, obligar a devolvelos cuando proceda y aplicar les consecuencies previstes cuando se incumplen les condiciones del conciertu.

This work is licensed under a Creative Commons Attribution 4.0 International License.