Un grupu de docentes protagonizó un enzarru na sede de la Conseyería d’Educación del Principáu d’Asturies pa denunciar la falta de meyores na situación de los profesores d’asturianu, cuasi un añu dempués del esperanzador -ya valeru- pactu ‘Asturies Educa’

La protesta, na que participaron representantes sindicales d’ADAE, CCOO y SUATEA, vien motivada pola ausencia d’especialidaes docentes pa la llingua asturiana y l’eonaviego, una reivindicación histórica del colectivu. Esta situación, denuncien, afecta directamente a la estabilidá llaboral y a la reconocencia profesional de más de 300 docentes n’Asturies.

L’enzarru produzse depués de conocese, el pasáu llunes, la respuesta del Ministeriu d’Educación a una iniciativa parllamentaria presentada pol diputáu Rafael Cofiño. Según esplicaron dende’l colectivu docente, la contestación tornó ser ambigua y ensin compromisos concretos, lo que xeneró fonda decepción.

Dende la asociación ADAE señalen que resulta “chocante” esta postura del Ministeriu, especialmente cuando, aseguren, la conseyera d’Educación vien calteniendo contactos continuos col Gobiernu español. “Nun ta afrontándose esta cuestión cola seriedá que merez”, afirmen, al tiempu que reclamen una solución efectiva a un problema que consideren de primer orde.

El profesoráu critica, amás, que’l Gobiernu asturianu nun pue desentendese de la so responsabilidá llindándose a treslladar la responsabilidá al español. Al so xuiciu, ye necesaria una actuación política decidida que desbloquee la situación. Poro, encamenten al presidente del Principáu, Adrián Barbón, a esixir al Gobiernu central y al Ministeriu d’Educación una respuesta nidia.

Tres meses de movilizaciones y con cuatro meses dende la llegada de la nueva ministra ensin avances significativos —nin siquier con una xunta formal solicitada—, el maltar sigue medrando. Los docentes recuerden que yá pasó cuasi un añu dende la firma del pactu “Asturies Educa” ensin que se produxeren meyores visibles nesta cuestión.

“Nun tamos énte un problema técnicu, sinón de voluntá política”, insisten dende’l colectivu, que nun ta dispuestu a siguir esperando indefinidamente. ADAE anunció que les movilizaciones van siguir hasta que’l Ministeriu s’afite a modificar la lexislación vixente y dar una solución definitiva a la situación del profesoráu de Llingua Asturiana y eonaviego.

This work is licensed under a Creative Commons Attribution 4.0 International License.