Una encuesta ellaborada por SUATEA ente docentes de Formación Profesional n’Asturies revela un importante maltar cola implantación de la nueva llei estatal de FP y dibuxa un panorama marcáu pola desorganización, la sobrecarga llaboral y la inseguridá del profesoráu.

Los datos recoyíos amuesen una valoración mayoritariamente negativa del procesu d’implantación. El 97,9% del profesoráu encuestáu afirma nun disponer d’instrucciones clares pa desendolcar los nuevos procedimientos, mientres que’l 100% considera insuficiente, contradictoria o directamente inexistente la respuesta de l’Alministración educativa.

La encuesta, según esplica’l sindicatu, permite identificar “problemes recurrentes y tendencies clares” nel desendolcu de la nueva normativa. Ente ellos destaca la creciente carga de trabayu que denuncia’l profesoráu: un 75% asegura sufrir una sobrecarga importante derivada de los nuevos procesos alministrativos y organizativos, y el 68,1% reconoz sentirse saturáu o frustráu pola situación actual.

Ún de los principales focos de conflictu ye la organización de la formación n’empreses, unu de los exes de la nueva FP dual. El 87,2% de los docentes considera que la so xestión nun ta resultando fácil pola falta d’empreses disponibles, la burocracia y l’ausencia d’instrucciones clares per parte de la Conseyería.

La encuesta tamién pon enriba la mesa un problema d’accesu y equidá educativa. El 60,4% del profesoráu afirma tener alumnáu migrante ensin númberu de la Seguridá Social, una situación que dificulta o impide la so participación nes práctiques n’empresa. Según denuncien, nun esisten soluciones clares nin criterios unificaos pa resolver estos casos.

La valoración global del nuevu modelu ye especialmente baxa. La llei de FP recibe una puntuación media de 1,78 sobre 5, mientres que la so implantación concreta n’Asturies queda nun 2,1 sobre 5.

La encuesta recueye tamién testimonios directos del profesoráu que reflexen el nivel de malestar esistente nos centros educativos:
“Tamos espuestos a reclamaciones continues y siento una total desprotección”.
“Ye un esperimentu fallíu”.
“Nun sabemos si acabamos en mayu o xunu; paez que cada centru va facelo d’una manera distinta”.

Dende SUATEA conclúise que la implantación de la nueva Formación Profesional presenta “graves riesgos organizativos” que tan provocando sobrecarga de trabayu, inseguridá y frustración ente’l profesoráu. El sindicatu reclama una respuesta inmediata de l’Alministración educativa y una clarificación de procedimientos pa evitar que’l procesu derive nun deterioru mayor del funcionamientu de la FP asturiana.