Asturies despide a Helena Trexu Fombella, escritora, poeta, narradora, traductora y activista, una de les voces más constantes de la lliteratura asturiana contemporánea. Queda una obra amplia, pero queda tamién la memoria d’una muyer que convirtió la defensa de la llingua, de la cultura y de los drechos nun compromisu de vida

Decimos alón a la voz, dura y dolce a un tiempu d’Helena, que como un ríu enllenaba tolos espacios.

Quiciabes esa seya una de les primeres coses que vienen a la memoria al pensar en Helena Trexu. La voz. Una voz reconocible, capaz d’enllenar una sala, d’entamar un alderique, de defender una idega hasta’l final y, al mesmu tiempu, d’averase con una enorme ternura y sensibilidá a un poema, a un neñu, a un animal o a cualquiera de les causes que consideraba xustes.

Helena Trexu Fombella, nacida en Sama, Llangréu, en 1944, dexónos esti sábadu. Y cuesta pensar na so ausencia ensin pensar, precisamente, en tolo qu’enllenaba cola so presencia.

Asturies pierde muncho. Pierde una mente clara, una memoria inacabable y una voz que nun cansaba cuando de defender drechos se trataba. Drechos llingüísticos, humanos, de les muyeres, de los animales, de los rapacinos, del país.

Helena escribió poesía, narrativa, lliteratura infantil, ensayu y torna. Escribió n’asturianu cuando facelo significaba -y sigue significando demasiaes vegaes-, trabayar contra corriente. Nun utilizó la llingua como un adornu, fízola ferramienta de creación, de pensamientu y de vida.

Una vez resumió esa relación cola escritura d’una manera difícil de superar: «plumiar por militancia, por querencia».

Neses poques pallabres hai muncho d’Helena.

La poesía acompañóla dende bien ceo. Camientos, coses, curuxes, La patria de la piel, Abril, Ringleres de carbón y salitre o Piedra gris con rellumos doraos formen parte d’una producción na que memoria, amor, cuerpu, ausencia, tiempu y compromisu social apaecen una y otra vez.

Hai nella una poesía íntima, pero nunca aislada del mundu. Porque Helena difícilmente podía mirar pa dientro ensin mirar tamién alredor.

La patria, la piel, la mar, el carbón, el salitre, la infancia, les muyeres, les alcordances. Hasta nos títulos de los sos llibros apaez esa manera de xuntar lo personal y lo colectivo.

Pero nun se llendó a un xéneru, Helena espublizó narrativa, cuentos, tornes y una extensa producción destinada a la reciella. Onde’l ríu besa la mar, Camín davezu, Olaya n’África, Llara quier ser astrónoma, Nora na viesca los milenta güeyos, Cuentos pa que suañes, Dos histories d’animales, A la gueta setes na seronda o Mitoloxía asturiana pa rapacinos y rapacines formen parte d’un trabayu constante por facer del asturianu una llingua na que se pudiera lleer, suañar y crecer.

Ella entendía perfectamente una cosa que delles polítiques institucionales paecen entá nun entender: una llingua nun sobrevive namás de discursos.

Sobrevive si los rapacinos tienen cuentos, si hai poemes, si hai noveles, si hai personaxes que s’enamoren, s’enfaden, viaxen, tienen mieu, ríen y viven nesa llingua.

Por eso la creación del Grupu Epona nun foi un elementu secundariu na so biografía. Foi una continuación natural del so pensamientu. D’editar llibros pasó a facer cuentacuentos, entrar nes escueles, organizar talleres y poner la llingua en manes de la xente, de la reciella.

Helena foi tamién una voz feminista cuando’l feminismu nun ocupaba los espacios que güei ocupa. Escribió sobre les muyeres y trabayó pa que les muyeres que escribíen n’asturianu tuvieren voz y visibilidá.

Poética de Muyeres ye ún de los exemplos más claros d’esa voluntá. Una antoloxía que reunió voces femenines de distintes xeneraciones y que buscaba romper una doble invisibilidá: la de escribir nuna llingua minorizada y la de facelo siendo muyer.

El feminismu d’Helena nun yera una etiqueta, yera parte d’una determinada manera d’entender el mundu, la mesma que la llevaba a defender a les persones migrantes, a los animales, a la naturaleza, a la infancia, a les persones ensin papeles o a un país al que-y siguíen negando’l drechu elemental de reconocer oficialmente la so propia llingua. Los títulos de munches de les sos intervenciones públiques son casi un programa vital: El compromisu políticu de los/es escritores, Llingua nel requexu, llingua torgada, La ética y la poesía faen bona xuntanza, Xente ensin papeles, Nación y llingua.

Resulta difícil dixebrar nel so casu onde acababa la escritora y onde entamaba la militante, probablemente porque nunca hebio tal llende. En so momentu foi candidata por Andecha Astur y la so defensa del país y de la xusticia foi una costante na so vida. Reclamaba la oficialidá del asturianu y la llibertá p’Asturies, pero la so defensa del país nunca foi incompatible cola solidaridá universal. Más bien al contrario, con un mensaxe tan necesariu estos díes, entendía que nun se pue reclamar dignidá pa la propia cultura y negá-yla al que vien de fuera; que nun se pue reclamar un drechu y permanecer indiferente ante la vulneración d’otros.

La muerte d’Helena ye una perda pal asturianismu, pal feminismu, pal ecoloxismu, pal activismu social, pal país y pala defensa de la xusticia. Pero ye, sobre manera, una perda enorme pa la cultura asturiana.

Queda la so manera d’entender la escritura. Queda la querencia. Queda la militancia. Queda la memoria de quien nunca aceptó callar cuando entendía que había una inxusticia.

Y queda aquella voz. Dura y dolce a un tiempu, inaparable como un ríu, enllenándolo too.

Hasta siempres, collacia.

This work is licensed under a Creative Commons Attribution 4.0 International License.