N’AST considera que la llamada “Llei de Cultura ya Identidá Asturiana” presentada pol Gobiernu d’Adrián Barbón confirma definitivamente’l fracasu políticu del PSOE na cuestión llingüística. Tres años falando d’una supuesta “oficialidá amable”, acaben presentando una alternativa descafeinada, ensin derechos reales y ensin valor xurídicu. Ye’l so “plan B”pa intentar enterrar la reivindicación histórica de la Oficialidáensin asumir el costu políticu de dicir claramente que nun la quien.
La propia información conocida sobro la futura llei demuestra’l so calter puramente propagandísticu. El Gobiernu fala de “blindar la identidá”, “protexer les llingües” y crear una gran estratexa de normalización con comisiones, organismos y planes fasta 2030, pero siempres “respetando’l marcu xurídicu vixente”. Ello ye: ensin Oficialidá y ensin reconocimientu de derechos efectivos.
La propia redacción conocida del proyeutu dexa claro que nun va garantizar l’usu del asturianu na Alministración, nin el derechu efeutivu de la ciudadanía a ser atendío na so llingua, nin la presencia real naXusticia, nin la obligatoriedá del idioma nel sistema educativu. Van siguir vendiendo “convivencia llingüística” y “protección cultural” mientres l’asturianu continúa siendo una llingua ensin drechos.
Resulta especialmente grave que quieran presentar esta llei como un gran avance cuando ellos mesmos nin siquier usen la toponimia oficial n’asturianu, la presencia del asturianuna RTPA ye ínfima y la escolarización un auténticu desastre. Dende N’AST recordamos que nengún ayuntamientu gobernáu pol PSOE nin por IU cuenta con una verdadera llexislación municipal que reconoza drechos efectivos pa la llingua asturiana. Nun esisten Ordenances municipales d’Oficialidá nin marcos reales de garantía llingüística. Dengún d’esos conceyos utiliza l’asturianu de manera habitual na so comunicación institucional, documentación o servicios públicos. Ye más, hai ayuntamientos como’ld’Illas, gobernáu por IU, que reprimen sistemáticamente l’usu de la nuesa llingua nacional.
La hipocresía llega al máximu nel propiu Gobiernu del Principáu. Adrián Barbón y la Alministración autonómica utilicen l’asturianu de manera puramente testimonial, cuasique folclórica, llindada a campañes concretes o actos simbólicos, mientres l’español sigue siendo la única llingua real de funcionamientu institucional. Nun pue falar de “protexer la identidá” quien nin siquiera incorpora con normalidá la llingua propia al día ente día del gobiernu.
N’AST recuerda que l’actual situación ye responsabilidá direuta del PSOE. L’Estatutu d’Autonomía ensin Oficialidá viénomos impuestu dende Madrid col parabien del PSOE y dende entós tuvieron décades enteres pa correxir esi erru históricu. La mayor traición producióse precisamente na pasada llexislatura, cuando esistíen posibilidaes reales pa sacar alantre la Oficialidá y el PSOE decidió negase a negociar seriamente hasta dexar morrer la reforma estatutaria.
Agora quien sustituyir la reivindicación de derechos por una macroestructura burocrática de “estratexes”, “comisiones intersectoriales” y “planes de normalización” que sirven sobro too pa reforzar la tradicional rede clientelar del PSOE de la política llingüística. Más cargos, más propaganda institucional y más subvenciones, pero ensin tocar el problema central: la falta de reconocimientu xurídicu del asturianu.
Amás, Barbón sigue impulsando una política activa de galleguización del occidente asturianu, diliendo la identidá llingüística asturiana baxo intereses políticos y creando un marcu ca vegada más allonxáu de la realidá histórica y cultural d’Asturies.
N’AST denuncia que esta “Llei de Cultura ya Identidá” nun ye más qu’una operación cosmética pa intentar pasar páxina tres el fracasu de la Oficialidá. Nin ye Oficialidá, nin ye aquella “oficialidá amable” que prometíen hai unos años. Ye namás una maniobra propagandística pa siguir negando derechos al pueblu asturianu mientres se vende una falsa imaxe de compromisu cola llingua.
Ensin Oficialidá nun hai ná que falar.
This work is licensed under a Creative Commons Attribution 4.0 International License.
