Grupu Epona quier apurrir el so gabitu pa qu’estos díes d’empreslle se faigan más llevaeros y pa ello ponen a llibre disposición delles de les sos obres, que puen descargase de baldre dende la so páxina web

Pa los adultos proponen la llectura del so volume “Poética de Muyeres 2014” nel que, con prólogu d’Helena Trexu Fombella, alcontramos poemes d’escritores asturianes dende nóveles a les más consagraes y dende l’estremu oriental al ocidental del país.

La reciella tien una llarga riestra d’opciones, ya que a los ocho cuentos que ya taben disponibles na so páxina (L’esguil músicu, El suañu la mazana, Yule , Los gatinos ecoloxistes, La xanina que deprendió andar en bicicleta, El magüestu, la xana y el trasgu, La casina trabayadora y El salgueru) amiéstase agora otros dos llibros: Llara quier ser astrónoma y Mitoloxía Asturiana pa la reciella. Toos ellos son obres d’Helena Trexu con illustraciones de Violeta Mateu y nellos, amás d’arruelu, los rapacinos y rapacines alcontrarán mensaxes de respetu al mediu ambiente, solidaridá, tolerancia y amor poles nueses tradiciones.