Facía falta esta respuesta a una campaña qu’entamó con informaciones falses sobre’l centru de menores y que foi xorreciendo al calor de la desinformación, la pasividá y l’aprovechamientu políticu de grupos ultres y d’extrema drecha llegaos al barriu p’alimentar el mieu y la división

Un neñu reclama’l fin del odiu

Más de mediu millar de persones acudieron ayeri a la concentración contra’l racismu convocada por Asturies Antifacista, mientres la protesta contraria al treslláu de los menores reunió a algo más d’un centenar. Les dos desendolcáronse ensin incidentes, separaes por pocos metros, baxo una fuerte tormenta de lluvia y granizu, pero mientres una falaba d’acoyer y pidía abandonar l’odiu, la otra alimentaba prexuicios y atacaba a menores, rescatando discursos que se creíen superaos va décades. Por supuestu, la fuerte xixilancia policial recayó sobre la primera concentración.

Hai que precisar que la concentración contraria al centru nun cuntaba col respaldu de l’Asociación de Vecinos de La Florida; la propia asociación refugó ya en declaraciones públiques el binomiu que se taba difundiendo ente «menor estranxeru non acompañáu» y delincuencia. De fechu, vecinos presentes na concentración antiracista declararon qu’hebio abondos residentes favorables al centru que nun acudieron por mieu a represalies o a ser señalaos por vecinos especialmente belixerantes.

La polémica nun nació de la llegada de nengún menor al barriu nin de nengún incidente protagonizáu por ellos. Entamó con una campaña d’alarma na que Vox anunció un supuestu «nuevu centru de menas» -falso- y llegó a venceyalu cola denominada por esa formación «invasión de Ceuta» y colos altercaos de Sograndio. La portavoz parlamentaria de Vox, Carolina López, foi la primera’n reclamar la «paralización inmediata» del proyectu. Ver la información sobre l’entamu de la polémica

El propiu Conceyu d’Uviéu tuvo que salir públicamente a cuestionar esa alarma, señalando que la información que tenía del Principáu «nun se correspondía» cola información interesada nin cola alarma que taben tresmitiendo sectores de la oposición. 

Cuando llegaron los datos concretos, la realidá yera bien distinta: nun yeren trenta, yeren ocho. Tampoco yeren menores recién llegaos de Ceuta nin procedentes de Sograndio. Son ocho rapazos tutelaos que lleven más d’un añu viviendo n’Asturies, anguaño n’Avilés, y tán estudiando. El treslláu plantegáu ye dende un recursu que necesita rehabilitación a unes viviendes de La Florida.

La Fundación Diagrama, responsable del programa, señaló que los menores yá tán integraos na sociedá asturiana; nun se trata de crear un serviciu nuevu sinón de treslladar ún que lleva años furrulando, onde tanto los usuarios como los profesionales yá viven y trabayen n’Asturies ensin que se produxera nengún tipu d’incidente.

Sicasí, ello nun debiera importar. Trátase de persones vulnerables ya ensin medios, menores, que merecen la protección que la llei-yos reconoz. Nun ye una cuestión d’opinión: la Llei Orgánica de Protección Xurídica del Menor aplícase a tol menor de 18 años que s’atope en territoriu estatal, independientemente de la so nacionalidá, y afita tien de ser una consideración primordial de les instituciones públiques y privaes. Consultar la Llei de Protección Xurídica del Menor nel BOE