La tolerancia colos grupos neonazis españolistes nun ye de recibu

Trátase del grupu conocíu como “Whiteboys”, una organización xuvenil d’ideoloxía neonazi qu’operaba en distintos puntos d’Asturies y taba implicada en agresiones y actos d’hostigamientu escontra coleutivos vulnerables, y que yá vien siendo denunciada dende 2024. La operación saldóse con 19 detenciones n’Uviéu, Xixón, Avilés y Castrillón.

Los deteníos tienen ente 14 y 22 años y tán siendo investigaos por presuntos delitos d’odiu y pertenencia a grupu criminal. Parte d’ellos tamién tán rellacionaos con tenencia d’armes y distribución de sustancies estupefacientes, según la información facilitada pola Policía y recoyida por distintos medios.

La investigación entamó en setiembre de 2024, cuando les brigades d’información detectaron les primeres actividaes del grupu. Los investigadores atribúyen-yos polo menos 14 agresiones físiques y actos d’acosu contra persones migrantes, integrantes del colectivu LGTBI y persones d’izquierda.

El coleutivu utilizaba redes sociales y canales dixitales pa esparder propaganda nazi y mensaxes supremacistes españolistes, combinando esa actividá con pintaes y acciones violentes nes cais, especialmente en Xixón.

La intervención aceleróse cuando la Policía deteutó tres múltiples denuncies y una escalada na violencia y l’alquisición d’armes blanques y materiales pa fabricar artefautos incendiarios. Nos rexistros realizaos en trés viviendes incautáronse haches, cuchiellos, pasamontañas, una pistola d’airsoft y simboloxía nazi españolista.

Los cuatro menores implicaos quedaron a disposición de la Fiscalía de Menores del Tribunal Superior de Xusticia d’Asturies. La operación enmárcase dientro del Plan Operativu de la Secretaría d’Estáu de Seguridá contra grupos xuveniles violentos organizaos.

L’actuación vuelve abrir el debate sobre la derechización xuvenil, la espansión de discursos españolistes d’odiu al traviés d’internet y la necesidá de reforzar les midíes de prevención y educación democrática ente la mocedá.

This work is licensed under a Creative Commons Attribution 4.0 International License.