Los médicos asturianos siguen en güelga nuna movilización que s’enmarca nel conflictu estatal contra’l nuevu borrador del Estatutu Marcu de Sanidá. La convocatoria, impulsada por sindicatos médicos y plataformes profesionales, suma yá meses de protestes intermitentes y menacia con convertise nuna confrontación de llargu percorríu si nun hai avances reales nes negociaciones.

Les revindicaciones del colectivu van muncho más allá d’una cuestión salarial. Los médicos denuncien sobrecarga asistencial, falta de personal, guardies obligatories mal remuneraes y una pérdida progresiva de condiciones llaborales que —aseguren— acaba repercutiendo direutamente na calidá de l’atención sanitaria. Una de les principales demandes ye qu’eses hores de guardia computen pa la xubilación y dexe d’esistir la obligatoriedá de xornaes estenses qu’en munchos casos superen les doce hores siguíes.

El conflictu vien de llueñe. Dende primeros d’añu vien celebrándose una selmana de paros cada mes, con convocatories en febreru, marzu, abril y agora mayu, con concentraciones delantre los centros sanitarios; la imaxe de decenes de médicos concentraos cola bata blanca delantre de los hospitales convirtióse yá nuna escena avezada n’Asturies y los profesionales insisten en que nun protesten solo polos sos derechos llaborales, sinón porque entienden que’l sistema sanitariu ta llegando a un puntu críticuy. Hai anuncies nueves movilizaciones pa xunu si’l Ministeriu y les alministraciones autonómiques nun reaccionen.

N’Asturies, la incidencia foi desigual según les fontes. Mentanto les alministraciones rebaxen les cifres de participación, los sindicatos falen de seguimientos altos, especialmente na atención hospitalaria, pero de fechu los datos oficiales apunten que’n febreru llegaron a suspendese alredor de doscientas ciruxíes y más de mil consultes na semana de paru. 

Dende la plataforma Médic@s del SESPA insisten en que la situación actual dexa a munchos profesionales al llímite físicu y emocional. Tamién reclamen más tiempu de descansu tres les guardies y una negociación específica pa la profesión médica, al entender que les sos responsabilidaes y formación requieren un marcu propiu.

La Conseyería de Salú y el Ministeriu defenden qu’hubo avances y acuerdos parciales, pero’l maltar sigue bien vivu ente’l colectivu. El desencuentru medra al tiempu que les llistes d’espera y la presión asistencial siguen siendo unu de los principales problemes de la sanidá pública.

Los organizadores recalquen que nel fondu d’esta protesta hai una cuestión que va más allá del conflictu llaboral: cuando la sanidá pública pierde profesionales, tiempu y recursos, quien acaba pagándolo ye tola ciudadanía.Una sanidá pública fuerte, con médicos que puedan trabayar con dignidá y ensin saturación permanente, significa profesionales más eficientes, diagnósticos más rápidos y meyor atención pa toos.