El Reggaeton Beach Festival foi la primer parada d’una campaña que quier informar a turistes y asturianos de los problemes venceyaos al actual modelu de turismu que carez Asturies. La viniente parada sedrá na Selmana Negra de Xixón

Esta ye la primer aición de munches que cuenten facer a lo llargu’l branu en puntos ya intres d’especial masificación turística. La mesma consistió nun repartu de trípticos billingües nos que se desplica en 18 puntos qué ye’l turismu caltenible, incluyendo pente otres cuestiones el respetu non solo pola ñatura y llugares, sinón pola identidá, cultura, formes de vida tradicionales y llingua propios d’Asturies, asina comu la garantía de los drechos llaborales del seutor, ufriendo emplegu de calidá, non precariu. Nel folletu recuéyese tamién, siguiendo los pasos de la propuesta presentada nel 2021 por Andecha Astur al “Principado”, la istauración d’una ecotasa y la necesidá d’aperiar una normativa llegal nuea.

Turismu masivu, malo pal turista, malo pal nativu, esa ye la frase que resume la filosofía d’esta campaña, que tien la so prósima cita el martes once de xunetu na Selmana Prieta de Xixón.

Llucía F. Marqués

This work is licensed under a Creative Commons Attribution 4.0 International License.