Andecha Astur presenta una propuesta de Llei de Turismu Caltenible

  • 1 Setiembre, 2021

La formación nacionaliega remata con esta propuesta de Llei de Turismu Caltenible  la so  campaña añal defendiendo un turismu caltenible, respetuosu col mediu ambiente y la identidá asturiana

Andecha Astur vien de presentar pa la so aprobación ente la Xunta Xeneral un documentu nel que apurren soluciones p’amenorgar les consecuencies negatives del turismu n’Asturies al tiempu que se garantice qu’esti implique un beneficiu direutu pa les fasteres que lu carecen. Esta llei vendría a sustituir a la Llei 7/2001, de 22 de xunu, de Turismu, que tien ya venti años d’antigüedá.

El modelu turísticu que proponen escluye’l de mases ya inclui una docena de midies qu’atienden a tolos aspeutos venceyaos al turismu: vivienda, fraude fiscal, emplegu y drechos llaborales, control alministrativu, proteición d’espacios ñaturales, tráficu, aparcamientos y tresporte públicu, afalar el comerciu llocal y de productos asturianos, sofitu a piqueñes y medianes empreses y espardimientu de la llingua y cultura d’Asturies.

“Un turismu caltenible, rentable y respetuosu ye posible” aporfien y pa ello na so propuesta incluin cuestiones comu la proteición del mediu ambiente, el respetu a les actividaes rurales tradicionales y a la cultura ya identidá asturianes, la garantía de los drechos llaborales de los trabayaores del seutor o  l’aplicación d’una ecotasa que revierta nes arques públiques,  p’atender con él los gastos públicos que xenera l’actividá d’esti seutor.

Esta cabera midía aplícase yá en munchos países europeos y en dellos territorios nel Estáu español y los sos fondos tendríen, sigún propón A.A, que revertir na recuperación d’espacios emblemáticos, actividaes rellacionaes cola diversificación del modelu económicu, proyeutos de recuperanza del paisax agrariu, proyeutos de formación, I+D+i y a proyeutos de transición enerxética, de manera que revierta na meyora direuta del nivel de vida de los conceyos afeutaos.

Nel documentu presentáu ente la Presidencia de la Xunta Xeneral recálquense los “numberosos, llamativos y vergoñosos casos asocedíos esti branu en materia turística” de los que culpen al actual  modelu de turismu masificáu y descontroláu “qu’afeuta bultablemente a los sirvicios públicos básicos que les Cases Conceyu ufren a la ciudadanía, a la calidá de vida y al modelu de convivencia y sostenibilidá que les asturianes y asturianos deseyamos pal nuesu país”.

 

Nuria Prendes


This work is licensed under a Creative Commons Attribution 4.0 International License.

1 Comment Already

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies