Otru turismu ye posible

  • 18 Xunetu, 2021

Cola campaña “Turistes, Asturies nun ta en venta, por un turismu caltenible y respetuosu col mediu ambiente y la identidá asturiana” Andecha Astur pon enriba la mesa la necesidá de plantegar otru modelu turísticu p’Asturies

La formación nacionaliega parte d’un analís de les desventaxes que presenta l’actual modelu turísticu asturianu, al que definen como masificáu, agresivu y descontroláu. Precariedá llaboral, estroza del mediu ambiente, torgues pal normal desendolcu de les actividaes económiques tradicionales,  xorrecimientu de los precios de la vivienda nes fasteres turístiques, masificación de los sirvicios públicos básicos cola consiguiente baxada de calidá, perda d’identidá llingüística y cultural… esos son dalgunos de los perxuicios del turismu p’Asturies.

Sicasí, reconocen la necesidá del turismu comu sector económicu del que dependen munches persones, polo que ven imprescindible la tramitación darréu d’una Llei de Turismu Caltenible, que sustituya a la desfasá Llei 7/2001 de Turismu, redautada por Tini Areces hai venti años.

Esa Llei de Turismu Caltenible que proponen apurre soluciones pa caún de los problemes xeneraos pol actual modelu de turismu. Asina inclui, pente otres munches considerances, la necesidá de corresponsabilizar al turista cola prestación de sirvicios que se-y dan y col caltenimientu de los bienes ñaturales, hestóricos y culturales de los qu’esfruta, al traviés d’un impuestu del turismu caltenible asemeyáu al que ya esiste en dellos países europeos, una ecotasa que repercuta nes arques asturianes y de los conceyos afeutaos.

La Llei tendría de garantizar un turismu ayenu al modelu de mases, respetuosu y compatible col caltenimientu’l mediu ambiente, les actividaes tradicionales de produción y la identidá d’Asturies, asina comu colos usos y costumes de les asturianes y asturianos y que nun multiplique’l riesgu sanitariu de la población.

Otru puntu importante que siñalen, comu via de finar cola precarización llaboral asociada a la hostelería, ye’l control de les empreses del seutor col envís d’asegurar que se contraten los trabayaores respetando íntegramente la llexislación llaboral vixente, torgando la esplotación llaboral y la precariedá agora mesmo presentes en tol seutor.

 

Nuria Prendes


This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies