La World Cheese Awards, que vien de cellebrase en Bergen, Noruega, reune añalmente a queseros, compradores, consumidores y gourmets de tol mundiu nun certame al qu’esti añu se presentaron nada menos que 3.500 quesos estremaos que foron xulgaos por 230 espertos de 29 naciones
Siete quesos ellaboraos con llechi de vaca repartieronse ocho medayes (con doblete del quesu Blanco) n’estremaes categoríes. La quesería Rey Silo foi la más premiada del país, con dos medayes de bronce, dos de plata y una d’oru, esta cabera pal so quesu Blancu.
De les cuatro medayes de plata dos foron pa la quesería estrella, Rey Silo, colos sos quesos Massimo y Besos y les otres dos pa Lazana ya’l quesu DOP Cabrales Cueva del Molín. Finalmente, na categoría de bronce tornamos a alcontrar a Rey Silo, colos quesos Asturblue y Blanco y a la Central Llechera Asturiana, col so quesu afumiáu pa sandwich.
Notes de tastia:
Quesu blancu (Rey Silo) – Productu cremosu, con corteya natural y de consistencia variable en función de la maduración, pero en xeneral mantegosu y suave.
Massimo (Rey Silo) – Fechu con llechi entero de vaca y con un mínimu de cuatro meses de maduración, ye un productu de tastu intensu y cremosu al tiempu que secu. Los tastios llácteos y florales son los predominantes, pero tien tamién matices d’ablana y manteguina. El so arume ye a vaca, con toques de viesca y champiñón nos más vieyos.
Besos (Rey Silo) – Quesu pequeñu y cremosu fechu con llechi crudo de vaca. Tastiu persistente y complexu, intensu y secu, de corteya comestible y aterciopelao. Consistencia fundente.
Lazana – Mantegosu, d’intensidá media ya interior suave, fechu con llechi de vaca. L’interior ye suave, con matices lláuticos y vexetales y la corteza fresco, con arume a seta y champiñón.
Quesu D.O.P. Cabrales Cueva del Molín – Quesu azul intensu de fabricación artesanal, fechu con llechi crudo de vaca, madurao en cueva natural y con un procesu de curación de tres meses. Llixeramente picante, arumosu y con tastu persistente.
Quesu Afumiau pa Sándwich – De marcáu tastu y testura fina, fechu con llechi de vaca y afumiáu con maera, lo que-y da un arume carauterísticu y un tonu amariellao.
Asturblue (Rey Silo) – Anovadora variedá de quesu azul afináu con auguardiente de sidre. Fechu con llechi de vaca.
Llucía F. Marqués
This work is licensed under a Creative Commons Attribution 4.0 International License.
