Vecinos y colectivos antifacistes convoquen pa esti xueves 27 d’agostu una concentración nel barriu uvieín de La Florida baxo’l llema «Fuera racismu de los nuesos barrios». La movilización naz como respuesta a les protestes contra’l treslláu al barriu d’un grupu de menores tutelaos y a la presencia nestes movilizaciones d’organizaciones de la extrema drecha.
Imaxe del manifestamientu contra los menores
El barriu de La Florida va vivir esti xueves una movilización de signu contrariu a les concentraciones que vienen celebrándose dende primeros d’agostu contra la llegada d’un grupu de menores tutelaos. La convocatoria difundida por Asturies Antifacista llama a concentrase a les 18:30 hores na plaza Carlos Osoro, xunto al Centru d’Estudios de La Florida, col mensaxe bien claru que figura nel cartelu: «Fuera racismu de los nuesos barrios».
La protesta pretende amosar el sofitu a los menores y responder al clima de tensión xeneráu alredor del recursu residencial proyectáu nel númberu 32 del Paseu de La Florida. El Principáu prevé treslladar inicialmente ellí ocho rapacinos que yá viven n’Asturies, nun centru con capacidá máxima prevista d’unes quince places y atención profesional les 24 hores. La propia Alministración autonómica insistió en que nun se trata d’una llegada repentina de menores de fuera d’Asturies, sinón del treslláu d’un serviciu de protección que yá funciona nel país.
La oposición al centru entamó con una convocatoria promovida nes redes, teóricamente por vecinos contrarios a la so instalación, na que se terxiversaba la noticia dando la idega de que a La Florida diben aportar decenes de menores vinientes de la recién llegada a Ceuta. La primer protesta reunió a decenes de persones, alcanzando’l so másimu’l pasáu 20, con unes 200 persones.
La presencia nestes concentraciones de grupos d’extrema drecha fíxose cada vegada más visible. Falange Asturias mostró públicamente’l so sofitu a les protestes y na última concentración participaron de manera mui activa militantes de Núcleo Nacional, dalgunos d’ellos col rostru tapáu.
Núcleo Nacional nun ye una simple organización vecinal nin una plataforma creada alredor del conflictu de La Florida. Trátase d’un grupu de extrema drecha radical, descritu por medios y investigadores especializaos como neonazi, nel que conflúin persones procedentes de ámbitos franquistes, falanxistes y nacionalsocialistes. Especialistes en radicalización consultaos pola Cadena SER llegaron a considerar que presenta un «riesgu eleváu d’estremismu violentu».
La presencia d’estes organizaciones causó preocupación inclusive dientro del propiu movimientu vecinal. El presidente de l’Asociación de Vecinos de La Florida, Jesús Ángel Alonso, criticó la llegada de persones ayenes al barriu y advirtió de que contribúin a aumentar la tensión. La asociación vien reclamando dende l’entamu que nun se criminalice a los menores nin se xeneren mensaxes de sospecha y odiu contra ellos.
El propiu presidente de l’Asociación de Vecinos plantegaba estos díes la cuestión dende otra perspectiva: qué puede suponer pa unos adolescentes llegar al so nuevu llar sabiendo que, antes inclusive d’instalase nél, llevan selmanes celebrándose manifestaciones contra la so presencia. Alonso llegó a calificar esa presión de «maltratu» hacia los rapazos.
La concentración del xueves quier ofrecer precisamente la imaxe contraria: la d’un sector del vecindariu que nun identifica l’acoyida con inseguridá y de colectivos que reclamen que La Florida seya un barriu ensin racismu y ensin intimidación fascista.
La convocatoria del xueves quier desplazar el centru del debate: de la identificación de los menores como una amenaza a la defensa de la convivencia y del derechu de neños y adolescentes tutelaos a vivir nun entornu seguru y señalar directamente a facistes y racistes comu los braeros peligros nos barrios. El cartelu de la convocatoria utiliza una imaxe inequívoca: «Fuera racismo de nuestros barrios», acompañada d’un símbolu nel que una figura deposita una esvástica nuna papelera. La concentración preséntase asina como una respuesta tanto al racismu como a la penetración de discursos fascistes y xenófobos nos conflictos vecinales. La cita va ser el xueves 27 d’agostu, a les 18:30 hores, na plaza Carlos Osoro de La Florida, n’Uviéu.
El casu llega, amás, nun momentu nel que la violencia y l’activismu d’organizaciones d’estrema drecha nun son cuestiones ayenes a Asturies, incluyendo casos d’agresión comu la sufrida por un menor de 15 años en Cagüeñes, atacáu por un grupu d’individuos por llevar una camiseta cola pallabra Asturies.
This work is licensed under a Creative Commons Attribution 4.0 International License.
