Parte del valláu perimetral de Sograndio durante les obres de refuerzu anunciaes n’agostu. Gobiernu d’Asturies.

CCOO del Hábitat y UGT reclamen a la Conseyería de Facienda una reunión urxente sobre’l Centru de Responsabilidá Penal de Menores de Sograndio y denuncien que siguen ensin recibir fecha pese a la solicitú formal. El Principáu anunció nos últimos meses refuerzos de plantiya, obres de seguridá y casi un millón d’euros d’inversión; los sindicatos sostienen que los problemes que carecen los vigilantes siguen precisando una negociación específica.

La crisis de Sograndio nun quedó zarrada coles inversiones anunciaes nin col treslláu de dellos internos adultos. CCOO del Hábitat d’Asturies y UGT reclamen agora una reunión urxente cola Conseyería de Facienda, Xusticia y Asuntos Europeos p’abordar específicamente la situación del personal de seguridá del Centru de Responsabilidá Penal de Menores.

Los sindicatos aseguren que presentaron una solicitú formal d’aconceyamientu y que l’Alministración entá nun-yos facilitó fecha. La so reclamación céntrase nes condiciones de seguridá d’un equipamientu onde se produxeron incidentes graves y onde, según la representación llaboral, los propios vigilantes denunciaron situaciones que ponen en riesgu la so integridá.

El centru arrastra meses de problemes. El Principáu reconoció una situación escepcional y anunció sucesives actuaciones. A mediaos de setiembre, tres internos adultos fueron treslladaos a un centru penitenciariu, al tiempu que’l Gobiernu cifraba en 935.000 euros les inversiones recientes en camarilles, valláu, videovixilancia, auxiliares de servicios y reparaciones.

Yá n’agostu, tres dos incidentes nos que se produxeron fugues y resultaron mancaos miembros del personal, la Conseyería anunciara diez efectivos nuevos de vixilancia, elevando la plantiya hasta 21 persones pa 53 internos. Tamién se plantegó una auditoría esterna de les grabaciones de videovixilancia y un cambéu na dirección del centru.

La reclamación sindical obliga agora a dixebrar dos cuestiones: les inversiones materiales y la negociación de les condiciones concretes del trabayu. Poner una valla más alta o aumentar cámares pue modificar la seguridá física del recintu, pero nun sustitúi l’análisis de turnos, protocolos, coordinación, formación o dotación efectiva que reclamen los representantes de los trabayadores.

La situación de Sograndio tampoco tien que confundise cola de los recursos de protección de menores tutelaos. La polémica de La Florida amosó cómo la mala planificación institucional puede acabar mesturándose con discursos que criminalicen a menores pola so procedencia. Sograndio ye un centru de responsabilidá penal y tien un réxime, funciones y perfiles distintos.

Esa diferencia ye esencial pa informar ensin convertir un problema de xestión y seguridá nun estigma colectivu. En La Florida, más de mediu millar de persones movilizáronse contra’l racismu dempués de que circularen informaciones falses sobre un recursu pa menores tutelaos.

La respuesta social tamién tuvo una dimensión vecinal explícita cuando colectivos convocaron una concentración en sofitu de los menores d’acoyida. La protección de la infancia y la seguridá de les plantiyes nun son oxetivos incompatibles: dambos dependen d’una rede pública planificada, con recursos y protocolos suficientes.

El clima d’estigmatización tampoco queda aislláu de otros episodios. Les menacies y agresiones d’estrema drecha rexistraes esti branu n’Asturies amuesen el riesgu de convertir conflictos sociales en marcos de mieu contra colectivos enteros.

Nesti casu, la posición de CCOO y UGT ye una reclamación sindical y tien que presentase como tal. La Conseyería sí documentó inversiones y refuerzos nos meses anteriores. La cuestión pendiente ye por qué, según los sindicatos, nun hai entá una fecha pa sentase a analizar con ellos la seguridá llaboral nun centru que la propia Alministración definió como sometíu a una situación escepcional.

This work is licensed under a Creative Commons Attribution 4.0 International License.