Cuatro muyeres que taben tomando daqué nun establecimientu de Posada fueron increpaes por un home que, tres intentar llamar la so atención, fixo xestos obscenos y acabó glayándo-yos «¡Imbéciles, comunistas!». Una d’elles yera Candela Guerrero, responsable de Mar de Violetas y conocida pola so actividá cultural y social en Llanera.

Candela Guerrero ye una de les agredíes

Los fechos produxéronse en Posada de Llanera. El testimoniu de Candela Guerrero fíxose públicu pocos díes depués: cuatro amigues taben tomando algo cuando un home empezó a manda-yos besos y saludos. Al nun recibir respuesta, pasó a facer cortes de manga y acabó insultándoles cola espresión «¡Imbéciles, comunistas!».

Según la información treslladada por Mar de Violetas, Candela y les sos compañeres decidieron denunciar lo asocedío y siguen col trámite, depués de que la Guardia Civil yos emplazara a otra fecha pa formalizalu. El colectivu afirma que l’autor del incidente ta venceyáu al Partíu Popular.

Candela Guerrero,  profesora de danza y educadora social, lleva años venceyada al movimientu asociativu y ye la responsable del Centru Mar de Violetas, un espaciu de danza, esporte, cultura y intervención comunitaria. La so trayeutoria social y cultural en Llanera inclúi tamién cooperación internacional y defensa de los drechos humanos, con actividá esti mesmu añu en Colombia y nel Sáḥara. Candela yá espresara meses atrás el so esmolecimientu pola hostilidá y los discursos d’odiu.

El casu ye especialmente relevante nel clima d’agresividá xeneral que protagonicen los ellementos d’estrema drecha, con una importante escalada d’agresiones que tienen llugar polo xeneral en llugares d’arruelu, lloñe d’escenarios políticos. Hai apenas tres meses, InfoAsturies recoyía la agresión facista a un menor de 15 años nes fiestes de Cagüeñes: un grupu d’alredor de quince individuos golpeólu con una botella, arrequexólu y amenazólu cuando llevaba una camiseta cola pallabra «Asturies».

N’agostu, el barriu uvieín de La Florida vivió otru episodiu d’escalada de tensión alredor del treslláu d’un grupu de menores tutelaos. Les protestes acabaron contando con una presencia cada vegada más visible de Falange Asturias y de Núcleo Nacional, grupu d’estrema drecha radical, lo que provocó una movilización vecinal contra’l racismu y en sofitu de los menores.

Pero’l casu más grave llegó esta mesma selmana na plaza de la Catedral d’Uviéu. Rubén Rosón y Jorge Fernández, militantes d’AMA Asturies, fueron brutalmente golpeaos por un grupu d’unos ocho mozos cuando trataron d’impedir que arrancaren una bandera arcuíris d’una caseta de les fiestes. Los agresores profirieron insultos homófobos y políticos, dieron puñetazos y pataes inclusive cuando les víctimes taben nel suelu y marcharon al berru de «Arriba España». Los dos tuvieron que recibir asistencia hospitalaria y presentaron denuncia. La agresión ultra d’Uviéu tuvo una amplia condena social y política.

Tamién en La Calzada, en Xixón, organizaciones vecinales vienen denunciando un deterioru de la convivencia. L’Asociación Alfonso Camín informó esta selmana d’amenaces y insultos contra un integrante de la so directiva de más de 80 años, al que llegaron a amenazar con «pillalu solu», fechos que yá fueron denunciaos ante la Policía.

Fuera d’Asturies, les imáxenes procedentes de Ceuta contribuyeron igualmente a esti clima de preocupación. Un neñu migrante d’ocho años resultó feríu na cabeza por un disparu de perdigones. Días antes, cientos de persones bloquearon durante más de dos hores l’accesu d’un camión de Cruz Roja que llevaba alimentos a población migrante.

Precisamente por eso se decidió denunciar el casu de Llanera, que podría paecer menor pero que s’encuadra dientro d’esti clima d’impunidá qu’arrodia a la estrema drecha. Denguna agresión ensin rempuesta.  

La población de Llanera mostró nestos díes el so sofitu a Candela y les sos compañeres. Agora corresponde que la denuncia siga’l so cursu y que les instituciones responsables —incluida la Delegación del Gobiernu n’Asturies— garanticen que les persones amenazaes o intimidaes puedan exercer los sos drechos ensin mieu. 

This work is licensed under a Creative Commons Attribution 4.0 International License.