Partimos de la base de que ta dafechu fuera llugar que’l Díi de la Nación Asturiana se cellebre con mises d’una determinada relixón, pero utilizar esi escaparate pa esparder un discursu xenófobu y belicista ye inaceutable

L’8 setiembre tendría de ser una xornada de tolos asturianos y asturianes. Pero un añu más, la celebración del Día de la Nación Asturiana volvió convivir con una identificación pública y mediática bien marcada pola relixosidá, remanando’l sentir nacional y la querencia de los asturianos pol símbolu de Cuadonga.

Jesús Sanz Montes aprovecha d’avezu’l púlpitu de la basílica pa facer política, pero esti añu foi un pasu más allá, nun discursu allonxáu a más nun poder de la baser teolóxica cristiana utilizó esi escaparate pa esparder odiu unviando mensaxes xenófobos y racistes.

L’arzobispu d’Uviéu dedicó bona parte de la homilía de Cuadonga a la crisis de Ceuta, recurriendo a un vocabulariu más propiu d’un parte bélicu que d’una prédica relixosa. Faló d’una «auténtica avalancha», d’una «guerra híbrida», aseguró que casi 80.000 persones «tomaron una ciudad española» presentando a la población ceutí como sitiada ente’l mieu, la intimidación y la violencia. La propia Archidiócesis reproduz estes pallabres na so crónica oficial de la celebración.

Más grave entá, Sanz Montes reclamó controlar en xeneral la llegada de persones migrantes y «descartar» a quienes, según él, entren con «intenciones perverses», llegando a utilizar la espresión «moros en la costa con otros turbantes».

Unos díes anantes, Sanz Montes yá utilizara Cuadonga y la idega de la «Reconquista» pa falar de la crisis de Ceuta, llamando a «recuperar lo que val la pena» frente a la «pretensión marroquí». Antes calificara la llegada de migrantes como una «invasión premeditada». Tou ello enmárcase nun discursu de «moros contra cristianos» que busca’l confrontamientu ya l’odiu hacia los que lleguen de países africanos.

Tou ello enmárcase nun problema anterior. Nun Estáu aconfesional y nuna sociedá plural, ye cada vegada más difícil de xustificar que’l Díi d’Asturies siga teniendo un componente relixosu tan marcáu nel so imaxinariu públicu.

La misa siguió cuntando con representantes políticos ya institucionales, miembros de les Fuerces Armaes y de los cuerpos de seguridá, y volvió ocupar un espaciu destacáu na cobertura pública del Día d’Asturies. La propia Archidiócesis presenta la eucaristía como celebración de “la Virxe de Cuadonga y del Día d’Asturies”. La cobertura mediática aseguró a Sanz la repercusión del so discursu d’odiu, respaldando la violencia contra los que fuxen de la probitú, de conflictos o de la falta de perspectives, cuchando’l terrén social nel que medren la xenofobia y el racismu más reaccionarios.

This work is licensed under a Creative Commons Attribution 4.0 International License.