El Conceyu Estraordinariu d’Andecha Astur aprobó crear una Estaya de Trabayu Elleutoral y llamó a superar la fragmentación pa construyir una candidatura común. La organización valoró especialmente’l pasu de Somos Asturies hacia un proyectu que toma Asturies como marcu propiu d’actuación.

El Día de la Nación Asturiana dexó esti 8 de setiembre distintes convocatories polítiques al marxe de los actos institucionales, pero tamién una cuestión que va ganar pesu según s’avere’l ciclu elleutoral de 2027: la posibilidá de construyir una alternativa asturiana d’izquierdes capaz de superar l’actual fragmentación.

Foi precisamente esta cuestión la que centró’l Conceyu Estraordinariu d’Andecha Astur, celebráu en Xixón coincidiendo col 8-S. La organización soberanista dedicó l’alcuentru a analizar la situación política, la estaya de Mocedá, les prósimes convocatories elleutorales y les condiciones necesaries pa intervenir nelles ensin arrenunciar a un proyectu políticu propiu p’Asturies.

El resultáu más concretu foi la creación d’una Estaya de Trabayu Elleutoral, encargada d’avanzar nos contactos y nes posibilidaes d’articular una candidatura común de la izquierda asturiana, y en tou casu pa dir tresnando les diferentes candidatures nacionales y de conceyu. Andecha considera que’l momentu obliga a superar sigles, desencuentros y estratexes particulares pa comprobar si ye posible poner en pie una ferramienta compartida con Asturies como marcu de decisión.

La propuesta nun ye nueva. Hai años que la organización vien defendiendo la necesidá d’un frente común asturianu y d’esquierdes y yá nes elleiciones de 2023 trató d’algamar un alcuerdu d’estes característiques antes de decidir presentase en solitariu. Naquel momentu, Andecha señalaba como condiciones básiques el calter d’esquierdes y la independencia de decisión política n’Asturies, una posición que tamién esplicó na entrevista al so candidatu a la Presidencia d’Asturies.

El Conceyu volvió sobre aquella idea, pero nun escenariu distintu. Especialmente significativa foi la valoración positiva que Andecha fixo de la evolución de Somos Asturies. La organización entiende como un pasu relevante que persones y sectores procedentes d’un espaciu políticu venceyáu hasta agora a estructures estatales pasen a defender Asturies como marcu propiu d’actuación y decisión política.

Nun significa una identificación ente dambos proyectos nin un alcuerdu yá zarráu, pero sí abre un terrén nuevu pal diálogu. Andecha considera que’l cambéu merece ser valoráu y que la respuesta nun puede ser llevantar nueves fronteres ente organizaciones, sinón explorar hasta ónde pueden llegar los puntos de coincidencia.

Esta llamada a la xunidá tien amás una continuidá cola manera na que la organización vien entendiendo’l Día de la Nación Asturiana. Nel 8 de setiembre de 2025 yá reclamara confianza nes propies fuercies del pueblu asturianu y capacidá p’axuntar voluntades, y la reivindicación de soberanía tuvo de nuevu presente esti branu nel homenaxe al Conseyu Soberanu nes trincheres de Tarna. Una tradición política que vien de más atrás y que tuvo tamién espresión colectiva na movilización de la esquierda alternativa nel 8-S de 2021.

Somos Asturies presenta’l so nuevu marcu políticu

Al empar, Somos Asturies escoyó tamién el 8 de setiembre pa presentar públicamente’l so proyectu nel PatiOh! de La Llaboral, en Xixón. Baxo’l lema ¿Ye lo qu’hai?, Covadonga Tomé y Xune Elipe defendieron una esquierda de «kilómetru cero», centrada nos problemes propios del país y ensin subordinar la so actuación a directrices tomaes fuera d’Asturies.

La xornada combinó alderique políticu, música y espicha. Somos punxo enriba la mesa cuestiones como la vivienda, los servicios públicos, el territoriu o la soberanía enerxética y alimentaria.

Acullá del propiu actu, el movimientu políticamente más significativu ye’l cambéu de marcu: la reivindicación d’una organización que tome les decisiones n’Asturies y dende Asturies. Un cambéu que lu avera a plantegamientos que l’asturianismu políticu vien defendiendo dende va décades y qu’esplica la valoración positiva realizada por Andecha nel so Conceyu Estraordinariu.

Aína tamién celebró una convocatoria propia en Mieres, onde defendió la construcción d’un ‘polu’ políticu asturianu.

El Día de la Nación Asturiana dexa asina un escenario en movimientu, pero la cuestión central pasa pela posibilidá d’articular una candidatura común de la izquierda asturiana. Andecha decidió convertir esa posibilidá nuna de les sos prioridaes polítiques inmediates y valora como un cambéu relevante que Somos empiece a asumir Asturies como marcu propiu de decisión.

This work is licensed under a Creative Commons Attribution 4.0 International License.