A más carga alministrativa, menos tiempu pa preparación de clases, coordinación, atención individualizada y contactu coles families. Col entamu del cursu 2026/27 a la vuelta de la esquina, los docentes remembren que nun son alministrativos, sinón ensiñantes
El profesoráu dedica una parte creciente del so tiempu a rellenar documentos, duplicar información, introducir los mesmos datos n’estremaes plataformes o responder a procedimientos que nun siempre tienen una utilidá pedagóxica clara.
El problema nun ye exclusivamente asturianu. Los últimos datos del informe TALIS 2024 pa España son especialmente elocuentes: el 64% del profesoráu español señala l’escesu de trabayu alministrativu como una fonte importante d’estrés. Amás, un 58% apunta a los continuos cambios curriculares y un 57% a la necesidá d’adaptase a requerimientos cambiantes de les distintes alministraciones. La carga burocrática como fonte d’estrés aumentó de forma notable dende 2018.
N’Asturies, la cuestión vuelve agora al primer planu cola campaña “Burocracia con xacíu. Queremos enseñar”, puesta en marcha por SUATEA de cara al cursu 2026/27. La iniciativa reclama una reorganización real de les xeres alministratives pa devolver tiempu a lo esencial: la ensiñanza.
Nun se trata de suprimir cualquier documentación nin de convertir los centros educativos n’espacios ensin control. Trátase de distinguir ente la burocracia necesaria y la burocracia que se reproduz por inercia, ensin aportar una meyora proporcional al funcionamientu del sistema.
Les programaciones didáctiques, la xestión d’ausencies, los informes, la acción tutorial, la convivencia, l’atención a la diversidá, les evaluaciones o les comunicaciones cola Alministración fueron acumulando procedimientos que, tomaos individualmente, pueden tener una explicación, pero que xuntos formen una carga considerable.
La situación ye especialmente visible na Formación Profesional. Esti mesmu añu, una encuesta ente docentes asturianos sobre la implantación del nuevu sistema señalaba importantes problemes de desorganización, instrucciones contradictories y sobrecarga. Un 75% del profesoráu consultáu denunciaba una carga importante derivada de los nuevos procesos alministrativos y organizativos.
Una parte de la solución pasa inevitablemente pola dixitalización, pero esta namás funciona si simplifica. Sustituir un formulariu en papel por cinco pantalles informátiques nun ye reducir burocracia.
Les plataformes tienen que compartir información, evitar que los mesmos datos tengan que rexistrase repetidamente y facilitar que documentos y procedimientos tengan formatos únicos. Y necesiten, amás, una cadarma fiable. Los problemas d’accesu a Internet que llegaron a dificultar el trabayu de más d’un centenar de centros asturianos nel entamu del cursu de 2023 demostraron les contradicciones d’una dixitalización ensin medios abondos.
Simplificar les comunicaciones, unificar modelos, eliminar duplicidaes, automatizar datos que yá obren en poder de l’Alministración y revisar periódicamente qué documentos siguen siendo necesarios son midíes que nun requieren renunciar al control, sinón exercelu con más xacíu, comu pidi la campaña.
El cursu 2026/27 ufierta una oportunidá pa revisar esa carga con un criteriu relativamente simple: si un trámite nun aporta información nueva, nun meyora l’atención a los escolinos y nun ye imprescindible pal control del sistema, tendría de simplificase o desaparecer.
Porque modernizar la escuela pública nun consiste en producir más documentos. Consiste, ente otres coses, en conseguir que’l profesoráu pueda volver dedicar la mayor parte del so tiempu a aquello pa lo que ta nos centros: ensiñar.
This work is licensed under a Creative Commons Attribution 4.0 International License.
