Ásturies tuvo Seleición Nacional de Fúbol enantes qu’España
Asturies tuvo seleición de fútbol enantes qu’España. Convien recordalo precisamente güei, cuando la seleición española disputa una final del Mundial y tol aparatu institucional, mediáticu y comercial convídanos a vivir el partíu como una celebración coleutiva na que, supuestamente, tola ciudadanía asturiana tendría que sentise representada.
La representación futbolística asturiana entamó a organizase na década de 1910. En 1917 yá competía internacionalmente. La seleición española, pela so parte, nun disputó’l so primer alcuentru hasta 1920.
Más d’un sieglu dempués, España pue convertise en campeona del mundu, pero Asturies nun pue competir nel Mundial nin siquiera disputar un partíu amistosu.
Nun se trata de reprochar nada a quien quiera que gane España. Cada persona tien derechu a vivir el fútbol, los símbolos y les identidaes como-y pete. El problema empieza cuando una preferencia particular se presenta como una obligación coleutiva y cuando se da por supuesto que la seleición española ye, necesariamente, la seleición de tola población asturiana.
La movilización emocional alredor de la seleición española suel presentase como daqué espontáneo. Sicasí, ta impulsada por una enorme maquinaria institucional, mediática y empresarial. Les televisiones, les marques, los gobiernos y bona parte de los medios convierten cada victoria deportiva nuna demostración d’unidá nacional. La camiseta confúndese cola bandera, l’afición cola ciudadanía y l’ésitu deportivu cola fortaleza d’España como nación.
Durante unos díes constrúyese un ‘nós’ aparentemente indiscutible. Un ‘nós’ nel que nun hai pueblos, territorios nin identidaes diferentes, sinón una única comunidá nacional española celebrando los goles del mesmu equipu.
Pero los goles nun borren la esistencia d’Asturies. Tampoco resuelven los conflictos d’identidá nin convierten automáticamente una nación impuesta nuna nación compartida. Cuando termina’l partíu, Asturies sigue ensin seleición, ensin oficialidá pa la so llingua y ensin capacidá pa decidir por sí mesma.
Otros pueblos ensin Estáu sí disponen de seleiciones reconocíes. Escocia y Gales formen parte del Reinu Xuníu, pero compiten internacionalmente col so nome, la so camiseta y la so bandera. Nun ye, por tanto, una imposibilidá deportiva nin una llei natural. Ye’l resultáu d’un marcu políticu nel que dellos pueblos puen representase y otros tienen que conformase con ser representaos por un Estáu nel que la totalidá de la so población nun necesariamente se reconoz.
N’Asturies, amás, esisten seleiciones asturianes que compiten y algamen reconocencia n’otros deportes. Lo que falta nun ye capacidá deportiva nin xente dispuesta a representar al país, sinón voluntá institucional y política pa recuperar la seleición de fútbol.
Asturies recuperó la so seleición futbolística a finales del sieglu pasáu. En diciembre del añu 2000, unes 25.000 persones enllenaron el Carlos Tartiere pa ver a Asturies ganar a Macedonia. En 2001, más de 13.000 persones asistieron n’El Molinón al partíu frente a Lituania. En 2002, la seleición volvió xugar y ganar, esta vegada contra Honduras, n’Avilés.
Tres alcuentros, tres victories y una respuesta popular que superó les previsiones.
Y entós dexó de xugar.
Resulta difícil nun pensar que l’ésitu asustó a quienes promovieren aquella recuperación. Lo que podía presentase como una celebración deportiva esporádica empezaba a convertise nuna manifestación coleutiva d’asturianía. Miles de persones reconocíense nun equipu que nun representaba una provincia, una comunidá administrativa nin una simple curiosidá folclórica. Representaba a Asturies.
Les instituciones toleren una identidá asturiana decorativa, útil pa les fiestes, la promoción turística y los discursos oficiales. Pero cuando esa identidá reclama instrumentos propios de representación, la respuesta ye’l silenciu. Pasa col fútbol, pero tamién cola llingua, cola cultura, cola economía y cola capacidá política pa decidir el futuru del país.
Sicasí, nun deberíemos quedar atrapaos nuna reacción puramente defensiva. Nun se trata de pasar el día indignándonos porque España tenga una seleición, nin de medir la nuesa identidá únicamente en función de lo que faigan otros pueblos. La respuesta nun pue ser namás protestar contra la exhibición d’españolismu. Tien de ser construyir y defender un proyeutu asturianu propiu.
Menos mirar pa la celebración española y más trabayar pa recuperar la nuesa seleición.
Asturies necesita espacios coleutivos contemporáneos nos que reconocese. Una seleición estable, con calendariu y vocación internacional, tendría un enorme valor deportivu, cultural y simbólicu. Nun resolvería por sigo sola los problemes del país, pero permitiría llevar al terrén de xuegu una realidá histórica: Asturies ye una nación y la so ciudadanía tien derechu a representase.
España tien seleición. Escocia tien seleición. Gales tien seleición.
Asturies tuvo seleición enantes qu’España.
Y sigue ensin ella.
This work is licensed under a Creative Commons Attribution 4.0 International License.
