Ensin Oficialidá de la llingua d’Astuires ye imposible una Asturies democrática

Un añu más los organizadores desvenceyen el manifestamientu del actu académicu que dio aniciu hestóricamente a la “Mani les Lletres”, torgando que se reclame la oficialidá ante les autoridaes asistentes al actu institucional

El Sábadu 9 de mayu, a les 12:00 hores, la Estación de Renfe d’Uviéu va volver ser puntu de salida d’un nuevu manifestamientu pola oficialidá del asturianu convocáu pola Xunta pola Defensa de la Llingua Asturiana. La convocatoria foi difundida pola propia organización nes sos redes sociales. 

La cita forma parte d’una reivindicación histórica que lleva décades na cai. Les fontes disponibles asitien l’orixe del movimientu modernu pola oficialidá nos años setenta del sieglu XX. En 1976 celebróse la primer gran manifestación pola llingua col lema “Bable nes escueles, Autonomía rexonal”, dexando nidio que dende l’entamu l’autonomía política y la llucha llingüistica diben de la man. 

Eso quier dicir que, en 2026, la demanda d’oficialidá lleva siquier 50 años espresándose públicamente. Mediu sieglu reclamando una ferramienta democrática que n’otres comunidaes con llingua propia llegó hai muncho tiempu y que n’Asturies nun llega ye a cencielles por falta de voluntá política, o meyor dicho, por nidia voluntá política a la escontra.

La oficialidá real y completa yLa esperiencia amuesa que les midíes parciales nun basten. Lloñe ta’l tiempu en que se creía en lleis d’usu llindaes ya incumplies, reconocencies simbóliques, normatives valeres o promeses electorales ensin cumplimientu que se repiten campaña tres campaña, siempres cola boca piqueña.e necesaria por trés razones fundamentales.

La primera ye la xusticia ya igualdá de drechos. Anguañu, quien quier vivir n’asturianu atopa llendes n’alministración, na xusticia, nos servicios públicos y nos ámbitos educativos. La oficialidá nun crea privilexos: corrixe una desigualdá histórica y garantiza que cualquier persona pueda usar la llingua del país ensin torgues.

La segunda ye la tresmisión xeneracional. Ensin marcu xurídicu fuerte, la presencia social del idioma queda a espenses de voluntarismu, midíes parciales o cambeos políticos. Una llingua ensin drechos garantizaos queda espuesta al retrocesu y namás l’enfotu decidíu de los asturianos permite que siga viva la so llingua pente les nueves xeneraciones.

La tercera ye la dignidá colectiva. Les llingües son patrimoniu cultural del país. La so protección efectiva nun puede depender namái del esfuerciu d’asociaciones, families, docentes o creadores; tien de ser compromisu institucional estable y decidíu.

Poro la movilización del 9 de mayu n’Uviéu tien un valor especial: recuerda que la demanda sigue viva, que vien de lloñe y que’l pueblu asturianu nun se resigna. Cincuenta años dempués, la cuestión  ye cuánto más se quier retrasar una decisión de xusticia democrática pa Asturies.

This work is licensed under a Creative Commons Attribution 4.0 International License.