Entá ensin que seya oficial, fálase d’una xubía d’ente 57 y 79 céntimos nel peaxe de l’autopista del Güerna, de les poques de pagu que queden nel Estáu.
Llevantar les barreres de los peaxes españoles ye de magar el 2018 una prioridá pal Ministeriu de Fomento, siendo ello que nos caberos años la mayoría de les autopistes de peaxe d’España pasaron a ser llibres, cola esceición del Güerna, la concesión más llarga concedía nel estáu español, que decidió que los asturianos, y namás los asturianos, tenemos de pagar pa entrar y salir llibremente del país. Asina, gracies a los alcuerdos roblaos primero pol PSOE y llueu pol PP, Aucalsa tien drechu a xestionar les entraes y salies a Asturies dica’l 2050, lo que yos permite continuar xubiendo’l coste al so gustu.
De los 11’30 euros que costaba salir d’Asturies va diez años, ye previsible que nel 2024 pasemos a 14’87, fasta 20,69 € en vehículos pesaos. Ello implica un incrementu del 4’03% respeutu al añu pasáu, un puntu más que la ya xabaz inflación interañal xeneral.
Con tolos sos pilancos, siendo l’autopista más pelligrosa l’estáu col triple d’acidentes que la media, cuadriplicando l’indiz de mortandá mediu y resultando inutil ca vegada que ñeva, l’Autopista del Güerna ye la única vía afayadiza pa viaxar a la Meseta dende Asturies. Imprescindible pa tresportistes y con un tráficu mediu diariu de más de 30.500 viaxeros, ye de fechu una de les más utilizaes del estáu.
Nel Dos Santos
This work is licensed under a Creative Commons Attribution 4.0 International License.
