Nel actu convocáu por Asturies Insumisa con motivu del Díi de la Nación Asturiana denunciáronse los problemes de la clas trabayaora asturiana y reclamóse un nueu marcu llegal col que se recuperen na so plenitú los drechos d’Asturies y de los asturianos

Aconceyaos a un pasu de la conocía como Casa Blanca, que nel pasáu fuere la sede del Gobiernu d’Asturies, primero el Conseyu d’Asturies y Lleón y depués del Conseyu Soberanu, la plataforma plural qu’aconceya la disidencia asturiana, Asturies Insumisa, escenificó la rotura cola Costitución Española ya l’Estatutu d’Autonomía, rasgando una pancarta cola portada d’ambos documentos, dexando pasar al traviés de los sos ciscos persones representando tolos drechos que se reclamen pal Pueblu Asturianu: repartu de la riqueza, sanidá y educación dignes, vivienda acesible, drechos pa les muyeres y los coleutivos LGTBI, pensiones públiques xustes…

Anantes, Llucía Fernández, miembru d’Andecha Astur -una de les doce organizaciones que componen Asturies Insumisa- lleó un manifiestu col que fexo rescamplar la realidá y les necesidades peles que ta pasando la clase trabayadora asturiana. “Los grandes datos económicos y los enormes beneficios empresariales anuncien a bombu y platillu la bona marcha de la economía asturiana. Pero si baxamos los pies a la tierra y pateamos les cais de cualesquier conceyu d’Asturies, lo que nos atopamos ye a una gran parte de los y les trabayadores asturianes trabayando en situación precaria y con sueldos que yá nun lleguen a fin de mes” declaró, dando un ampliu repasu a la llaceriosa situación que vive la clas trabayaora asturiana, defendiendo l’autoorganización comu ferramienta y alertando del pelligru de que llegue a normalizase el fechu de que movilizase escontra esos problemes lleve a multes y condergues “Reaccionar ante too ello, pelear por coses tan básiques como unes condiciones llaborales decentes, una casa onde vivir o una cesta de la compra asequible, págase con multes, xuicios y cárcel”.

Pa finar l’actu, estendióse una asturina de grandes dimensiones que s’arrodió coles pancartes reclamando los drechos p’Asturies.

Asturies Insumisa ye una plataforma plural conformá por organizaciones ciudadanes, sindicales, polítiques… que s’asitíen nel ámbetu de la esquierda política y que nun tán comprometíes nos mecanismos del poder establecíu, énte’l que defenden p’Asturies un orde sociopolíticu estremáu, sofitáu na igualdá, la xusticia, el desarrollu  sostenible, el repartu la riqueza, el respetu a la identidá asturiana y la xestión popular del poder.

Formen parte d’Asturies Insumisa les siguientes organizaciones: Andecha Astur, Batel,  Conceyu Popular de la Contorna d’Avilés, Cordinaora d’Asturies pola Defensa del Sistema Públicu de Pensiones (COESPE), Darréu, Hostelería’n Llucha, Izquierda Revolucionaria, La Clas Trabayaora, Llibres y Combatives, Mieres en Llucha, Plataforma d’Ausiliares del Serviciu d’Aída a Domiciliu (SAD) y Sindicatu d’Estudiantes.

This work is licensed under a Creative Commons Attribution 4.0 International License.