-Lleíu por Llucía Fernández (Andecha Astur) nel marcu la concentración entamá por Asturies Insumisa comu cellebración revindicativa del Díi d’Asturies-

Güei atopámonos equí, nesti 8 setiembre, porque compartimos un mesmu oxetivu: recuperar na so plenitú los drechos d’Asturies, los drechos que nos correspuenden comu clas trabayaora, comu ciudadanía y comu asturianos.

Güei tamos equí participando nun actu reivindicativu nel que, más allá de celebraciones triunfalistes, queremos poner de manifiestu la realidá y les necesidades peles que ta pasando la clase trabayadora asturiana.

Nestos últimos meses asistimos diariamente a declaraciones publiques de gobernantes y axentes sociales proclamando al altu la lleva la bona marcha del país y unes cifres macroeconómiques que garantícennos un futuru inmeyorable.  

Pero eses grandes cifres nun pueden esconder por más tiempu la cruda realidá pela que tán pasando decenes de miles de trabayadores asturianos y asturianes.

Un trabayu dignu, una vivienda, la lletricidá o’l gas empiecen a tornase en luxos demasiado caros que munchos y munches trabayadores cada vez tamos más cerca de nun poder permitinos. Amás d’ello, el desaxeráu encarecimientu de los precios fai qu’hasta los propios alimentos dexen de tar garantizaos pa toos y toes.

Los grandes datos económicos y los enormes beneficios empresariales anuncien a bombu y platillu la bona marcha de la economía asturiana. Pero si baxamos los pies a la tierra y pateamos les cais de cualesquier conceyu d’Asturies, lo que nos atopamos ye a una gran parte de los y les trabayadores asturianes trabayando en situación precaria y con sueldos que yá nun lleguen a fin de mes.

Tamién tamos yá fartes y fartos de qu’una y otra vez nos recuerden que la pensión media n’Asturies ta perriba la media del Estáu español, pero, mientres, faen cuanto pueden pa privatizar les pensiones publiques y pa esconder la esistencia de miles de pensionistes n’Asturies que perciben unes pensiones coles que ye imposible llevar una vida digna.

Lo mesmo que glayamos yá basta a la ruindá que venden comu futuru a la mocedá, yá basta de nun reconocer los plenos drechos de les muyeres nesta sociedá, yá basta de violencia y asesinatos machistes y yá basta de cuestionar la diversidá, los derechos del coleutivu LGTBI y los derechos de los y les inmigrantes.

N’otru aspeutu, y detrás de la imaxe d’unes redes de sanidá y educación públiques exemplares, tenemos una realidá mui diferente: una sanidá y una educación públiques que tán dexándose venir abaxo pola falta d’unos recursos económicos de los qu’en realidá sí disponemos, pero que cada vez se filtren en mayor cantidá hacia la sanidá y la educación privaes.

Y pa cambiar too esto, namás nos planteen la solución máxica del turismu. Un turismu masificáu a más nun poder y pensáu exclusivamente pa que l’empresariáu faiga caxa. Un modelu turísticu que crea empléu precariu na so mayor parte, que nun ameyora les condiciones llaborales de los y les trabayadores, que malpenes ayuda al desarrollu llocal de los conceyos y que yá ta orixinando un procesu de turistificación y xentrificación qu’obliga a la población residente a abandonar les sos viviendes pa dexales en manes d’especuladores y empreses promotores de pisos turísticos. Un modelu turísticu que, al final, yá ta convirtiéndose nun problema y non nuna solución.

Estos díes atrás presenciamos un episodiu llamentable equí en Xixón, onde’l Gobiernu municipal fascista pretendía censurar cualesquier manifestación cultural que s’espresare n’asturianu. Tampoco ye nada nuevo. El nuestru idioma vien sufriendo una discriminación intolerable, que namás puede resolvese cola declaración d’oficialidá y un tratamiento igualitariu con respeutu a los demás idiomes oficiales del Estáu español.

Por embargu, reaccionar ante too ello, pelear por coses tan básiques como unes condiciones llaborales decentes, una casa onde vivir o una cesta de la compra asequible, págase con multes, xuicios y cárcel. Casos como’l de Les 6 de La Suiza y otres decenes de casos, sí decenes de casos que tán dándose n’Asturies, con condenes y peticiones de munchos años de prisión, pueden llegar a ser sucesos cotidianos a midida que les movilizaciones sociales vayan teniendo llugar.

Tamos hoi nun sitiu simbólicu, delantre de la conocida como Casa Blanca, que nel pasáu fuere la sede del Gobiernu d’Asturies: el Conseyu d’Asturies y Lleón y depués del Conseyu Soberanu. Un Gobiernu que, naquel momentu, nun tuvo otru remediu que superar el marcu llegal que lu llimitaba, pa poder facer una meyor defensa de la so tierra y del so pueblu.

Agora, nunes circunstancies mui distintes, seguimos teniendo un marcu llegal insuficiente, que tenemos de cuestionanos si queremos avanzar.

Los derechos del pueblu asturianu y de la clas trabayaora asturiana nun puen defendese dende una Constitución española que permite la llegalidá d’unes condiciones llaborales en munches ocasiones insoportables y unes condiciones de vida de probeza y, incluso, de probeza absoluta pa miles de persones; una constitución que se diseñó acordies colos intereses del Estáu, del capital y de los Borbones herederos de Franco.

Nin tampoco se puen defender estos drechos dende un Estatutu d’Autonomía que se mos torgó votar y que ye tan inútil pa iguar los problemes más importantes a los que nos enfrentamos los y les trabayadores d’Asturies comu inútil pa costruyir el nuesu futuru.

Tenemos que da-y la vuelta a too esto. Tanto al marcu llegal que llevantaron, comu a les polítiques neolliberales con que faen por reducinos y precarizanos. Ante ello, tenemos que poner la nuesa propia autoorganización como la ferramienta que pueda cambiar y tresformar el presente y el futuru al que quieren condenanos.

Una autoorganización que ponga en marcha práutiques y espacios d’apoyu mutuu y d’aición movilizadora capaces de tensar la cuerda social, capaces de volver a enllenar les cais de protesta y reivindicación y capaces de desarrollar al máximu tola fuerza que la clas obrera asturiana puede poner en xuegu p’algamar unes condiciones dignes de vida y trabayu.

Son estes práutiques d’apoyu mutuu y movilización, frente a los problemes del día a día, y esta autoorganización de la que nos dotemos, lo que pueda permitinos acumular la fuerza necesaria p’avanzar hacia la tresformación social y haza un futuru de xusticia social y llibertá pa toos y toes.

Tamos construyendo’l futuru cuando nos organizamos, cuando nos movilizamos y cuando ponemos les bases pa tresformalu.

Compañeres, compañeros, gracies por tar equí esti 8 setiembre. Y tai atentes y atentos porque vamos siguir viéndonos nes cais.

¡Puxa la llucha obrera!. ¡Puxa Asturies!.

This work is licensed under a Creative Commons Attribution 4.0 International License.