Les manifestantes foron atacaes por un home qu’entró a prevocar con insultos y menacies
Ayeri, comu ca miércoles final de mes, delles organizaciones tornaron xunir la so voz contra les violencies machistes, xuntu al edificiu de la Gota Llechi en Xixón. La evolución de la pancarta d’un mes pa otru respiga y resume perfechamente’l porqué ye tan emportante dexar patente la refuga social a determinaos comportamientos: si en xineru espeyaba 10 femicidios ya’n febreru se recoyíen 14 asesinaes, en namás un mes la cifra subió a venti, una d’elles n’Asturies. Venti muyeres víctimes de la violencia que considera aceptable quita-yos la vida, porque, al cabu, son muyeres.
Nel trescursu l’aconceyamientu vivióse mesmamente un ataque, protagonizáu por un home que, ofendíu pola defensa del drechu a la vida de les muyeres, empobinó escontra la pancarta, profiriendo insultos y menacies, teniendo de ser retiráu pola policía ante’l so comportamientu violentu.
Los convocantes son Andecha Ástur, Anticapitalistes, Dar de mamar, Asociación de Pensionistes de Xixón, Feminismu en Llucha del CSI, la plataforma del serviciu d’ayuda a domiciliu -SAD-, Podemos y Verdes-Equo. Nesta ocasión la llectura del comunicáu corrió a cargu de l’Asociación de Pensionistes, qu’aporfiaron que’l problema ta lloñe d’iguase, comu testifiquen les 14 muertes en menos de dos meses; los sos nomes foron lleíos con solemnidá nel trescursu la concentración.
Redaición InfoAsturies
This work is licensed under a Creative Commons Attribution 4.0 International License.
