Xixón acoyó ayeri, comu ca caberu miércoles de mes, una concentración contra les violencies machistes

Sol lema ‘Nin una menos’, dellos coleutivos feministes y sociales diéronse cita xuntu al edificiu de la Gota Llechi p’amosar la so refuga ante los caberos crímenes machistes, remembrando qu’a nivel estatal les muyeres asesinaes pasaron de diez a catorce nel caberu mes, depués d’un xineru tarrecible con diez femicidios.

Los convocantes son Andecha Ástur, Anticapitalistes, Dar de mamar, Asociación de Pensionistes de Xixón,   Feminismu en Llucha del CSI, la plataforma del serviciu d’ayuda a domiciliu -SAD-, Podemos y Verdes-Equo. Nesta ocasión la llectura del comunicáu corrió a cargu de l’Asociación de Pensionistes, qu’aporfiaron que’l problema ta lloñe d’iguase, comu testifiquen les 14 muertes en menos de dos meses; los sos nomes foron lleíos con solemnidá nel trescursu la concentración.

Redaición InfoAsturies

This work is licensed under a Creative Commons Attribution 4.0 International License.