El prósimu díi diez de Payares cellebraráse una concentración n’Uviéu col envís de desixir a los gobiernos central y autonómicos qu’afiten mecanismos pa la recuperación pal dominiu públicu d’aquellos bienes inmatriculaos pola ilesia católica ensin apurrir más documentación qu’ una certificación eclesiástica
Dende 1946 y fasta va cincu años la ilesia católica tuvo la prerrogativa d’inscribir nel Rexistru la Propiedá bienes inmuebles apurriendo namás una autocertificación eclesiástica ya ensin dalu entítulu de propiedá. Ensin publicidá, ensin abrir un espediente de dominiu, ensin dalu procedimientu que garantice el so drechu. Nel 1998 el gobiernu d’Aznar ampliaba esti beneficiu, permitiendo inmatricular tamién llugares de cultu.
Gracies a esta permisividá llegal la ilesia, nun espoliu ensin precedentes, punxo al so nome bienes pertenecientes al pueblu por valor de munchos millones: llocales, finques, viviendes, cimenterios, ilesies, places catedrales…más de 100.000 propiedaes en tol estáu y un númberu indetermináu n’Asturies -seique s’albidra más de 1.500- puesto que pesia les pidiciones del Grupu Inmatriculaciones Asturies y Andecha Astur, tolos llistaos apurrios fasta’l intre pol Colexu Oficial de Rexistradores de la Propiedá son incompletos, pocu claros ya inesautos.
L’actual gobiernu del Estáu recoyía nos sos alcuerdos de coalición la reversión d’estes inmatriculaciones y a ello comprometióse Pedro Sánchez, nel so discursu d’investidura, y Adrián Barbón en declaraciones a la prensa. Sicasí, pesia toles promeses, de fechu nun s’avanzó migaya na formulación de midies llexisllatives que reviertan la situación.
Poro, el Grupu Inmatriculaciones Asturias, convoca una concentración el diez de payares a les seyes de la tardi na esplanada frente a Santa María del Naranco, coincidiendo con concentraciones asemeyaes en tol Estáu, pa remembrar a los gobiernos (central y asturianu) que sigue ensin conocese siquiera la magnitú de tolo arrampluñao pola ilesia.
Esmolez en concretu la situación de los monumentos prerrománicos, padremuñu de tolos asturianos.
L’actu tará amenizáu cola música y bon facer de la Charanga Ventolín.
Alberto Rodríguez
This work is licensed under a Creative Commons Attribution 4.0 International License.
