• Portada
  • >
  • Cultura
  • >
  • Andecha Astur presenta a la comisión de Pidios y Drechos Fundamentales que se faiga públicu l’inventariu completu y actualizáu d’inmatriculaciones

Andecha Astur presenta a la comisión de Pidios y Drechos Fundamentales que se faiga públicu l’inventariu completu y actualizáu d’inmatriculaciones

  • 15 Maio, 2020

L’inventariu, solicitáu ya n’abondes ocasiones pol Grupu d’Inmatriculaciones Asturies, ta en posesión del “Principado” y del gobiernu d’España, que se ñeguen a facelu públicu

Dende 1946 y fasta va cincu años la ilesia católica tuvo la prerrogativa d’inscribir nel Rexistru la Propiedá bienes inmuebles apurriendo namás  una autocertificación eclesiástica ya ensin dalu entítulu de propiedá. Ensin publicidá, ensin abrir un espediente de dominiu, ensin dalu procedimientu que garantice el so drechu. Nel 1998 el gobiernu d’Aznar ampliaba esti beneficiu, permitiendo inmatricular tamién llugares de cultu.

Gracies a esta permisividá llegal la ilesia, nun espoliu ensin precedentes, punxo al so nome bienes pertenecientes al pueblu por valor de munchos millones: llocales, finques, viviendes, cimenterios, ilesies, places catedrales…más de 100.000 propiedaes en tol estáu.

Nel 2017 el Grupu d’Inmatriculaciones Asturies, ensertáu nel coleutivu estatal RECUPERANDO solicitó’l llistáu completu de los bienes inmatriculaos n’Asturies, a lo que foron retrucaos con un documentu incompletu ya incorrechu, el mesmu que remanó la Conseyera va un mes nel Parllamentu, pesi a contar con un inventariu completu y detalláu apurríu’n Febreru de 2019 pol Colexu Rexistraores d’Asturies.

Andecha Astur albidra qu’esti secretismu tapez un espoliu descomanáu de lo que ye’l padremoñu de tolos asturianos y que, de confirmase les sospeches, incluyiría inmuebles d’incalculable valir hestóricu y arquiteutónicu, comu ye l’arte prerrománicu asturianu.

Poro, ante la ñegativa de l’alministración autonómica de facer públicu esti inventariu completu y actualizáu de los bienes públicos apropiaos pola Ilesia Católica, y acoyéndose a la Llei Orgánica 4/2001, regulaora del Drechu de Pidíu, Andecha Astur vien de presentar énte la Comisión de Pidíos y Drechos Fundamentales del “Principado” un escritu nel que se reclama que la Conseyería de Cultura, Política Llingüística y Turismu del “Principado” lu faiga públicu darréu.

Con ello pretenden determinar la magnitú del espoliu qu’al paecer provocó la ilesia católica al inmatricular al so nome la práutica totalidá de l’ayalga arquiteutónica del prerrománcu asturianu, pente otros inmuebles, una información que, sigún Andecha Astur, tolos asturianos tienen drechu a conocer.

Redaición InfoAsturies

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies