• Portada
  • >
  • Asturies
  • >
  • El Grupu d’Inmatriculaciones Asturies reclama esta tardi la devolución de los bienes públicos arrampluñaos pola Ilesia

El Grupu d’Inmatriculaciones Asturies reclama esta tardi la devolución de los bienes públicos arrampluñaos pola Ilesia

  • 16 Febreru, 2022

Güei a les 18:00  nel Campu Valdés, en Xixón, tendrá llugar una concentración col envís d’esixir a los gobiernos español y asturianu información detallada de les inmatriculaciones realizaes pola ilesia dende 1946 ensin apurrir más documentación qu’una simple certificación eclesiástica

Dende 1946 y fasta va cincu años la ilesia católica tuvo la prerrogativa d’inscribir nel Rexistru la Propiedá bienes inmuebles apurriendo namás  una autocertificación eclesiástica ya ensin dalu entítulu de propiedá. Ensin publicidá, ensin abrir un espediente de dominiu, ensin dalu procedimientu que garantice el so drechu. Nel 1998 el gobiernu d’Aznar ampliaba esti beneficiu, permitiendo inmatricular tamién llugares de cultu.

Gracies a esta permisividá llegal la ilesia, nun espoliu ensin precedentes, punxo al so nome bienes pertenecientes al pueblu por valor de munchos millones: llocales, finques, viviendes, cimenterios, ilesies, places catedrales…más de 100.000 propiedaes en tol estáu.

L’inventariu, solicitáu ya n’abondes ocasiones pol Grupu d’Inmatriculaciones Asturies, ta en posesión del “Principado” y del gobiernu d’España, que se ñeguen a facelu públicu

Nel 2017 el Grupu d’Inmatriculaciones Asturies, ensertáu nel coleutivu estatal RECUPERANDO solicitó’l llistáu completu de los bienes inmatriculaos n’Asturies, a lo que foron retrucaos con un documentu incompletu ya incorrechu, el mesmu que remanó la Conseyera va un mes nel Parllamentu, pesi a contar con un inventariu completu y detalláu apurríu’n Febreru de 2019 pol Colexu Rexistraores d’Asturies.

Andecha Astur presentó tamién nel 2020 a la comisión de Pidios y Drechos Fundamentales que se ficiere públicu l’inventariu completu y actualizáu d’inmatriculaciones, albidrando “qu’esti secretismu tapez un espoliu descomanáu de lo que ye’l padremuñu de tolos asturianos” y que, de confirmase les sospeches, incluyiría inmuebles d’incalculable valir hestóricu y arquiteutónicu, comu ye l’arte prerrománicu asturianu.

Sicasí, y pese a tar esplícitamente recoyíu esti puntu nel programa elleutoral del PSOE y Podemos, sigue ensin conocese la magnitú de lo inmatriculado dende 1946.

Tou esti tiempu dende’l Grupu d’Inmatriculaciones Asturies y RECUPERANDO lleven solicitando una xunta col presidente’l gobiernu o colos sos ministros pa poder espone-y les sos propuestes, consiguiendo únicamente ser atendíos en delles ocasiones pola Comisión Europea, pero non pol gobiernu estatal.

Poro, esta tardi convoquen una concentración a les seis de la tardi en Campu Valdés, pa reclamar la información sobro los bienes inmatriculaos y desixir la so devolución por parte la Ilesia.

 

Redaición InfoAsturies


This work is licensed under a Creative Commons Attribution 4.0 International License.

1 Comment Already

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies