Dende l’aniciu de l’andanciu Asturies destacó pola so aportación a la solución del problema a nivel científicu y teunolóxicu: fabricación casero de pantalles, creación d’alendadores con impresores 3D, la participación nel Programa Horizonte 2020 puestu en marcha pola Comunidá Europea pa futuribles emerxencies… y agora’l desendolcu d’un deteutor capaz de midir en menutos la carga viral de Covid-19

Científicos de la Universidá d’Uviéu, acomuñaos con  investigaores de la Universidá Politéunica de Cartagena (UPCT) y de la Internacional de La Rioja, baxo la supervisión del Comité d’Ética d’Asturies, trabayen na creación d’un dispositivu portátil de baxu coste pa deteutar cuasi nel momentu la presencia o ausencia de infeición por Covid-19, cola mesma fiadilidá que los PCR, pero muncho más rápido y menos invasivo.

Antonio Javier García Sánchez y Joan García Haro, del grupu d’investigación d’Inxeniería Telemática de la UPCT, xunto col catedráticu del área Química Física Toribio Fernández Otero, son los responsables del diseñu y desendolcu d’esti dispositivu, que basa’l so furrulamientu nes señales lletroquímiques xeneraes polos cambeos xenómicos derivaos de la presencia del virus y que tará llistu nel 2021, permitiendo facer les prebes “in situ”, con una espera de pente 30 y 40 menutos pa saber el resultáu.

Llucía F. Marqués

This work is licensed under a Creative Commons Attribution 4.0 International License.