La plantiya de los Cientros de Díe lleva ensin cobrar dende’l 13 de Marzu

  • 14 Mayu, 2020

La precarización tantu de los puestos de trabayu comu del serviciu prestáu ye la principal consecuencia de la privatización de servicios sociales comu’l d’atención a les persones mayores

Les protestes de les trabayaores de los cientros de díe poles precaries condiciones llaborales y la incomprensible falta de conveniu remóntense a muncho anantes de la cris sanitaria, pero con ella la so situación agrávase considerablemente.

El 13 de Marzu, ante l’estáu d’alarma, tuvo llugar el preslle de los Cientros de Díe de Persones Mayores ascritos a l’Alministración de Servicios Sociales y Bientar d’Asturies, siendo comunicao a les trabayaores la solicitú d’un ERTE. Tres de les cuatro empreses de les que depende esti serviciu -Gerusia, Eulen y Aralia- ingresaron esi mes namás la nómina correspondiente del ún al 13 de Marzu, dando por supuesto pol silenciu alministrativu l’aprebación del ERTE ya informando a les emplegaes que cobraríen del SEPE de magar el 14 de Marzu. Sicasí, les trabayaores nun recibieren dala comunicación del Serviciu Públicu d’Emplegu que corroborare esti puntu.

De magar equí, la situación varía en función de la empresa responsable, ya que mientres los contrataos por EULEN cobren efeutivamente del SEPE, la empresa Gerusia recibe con fecha de 29 d’Abril la notificación de refuga del ERTE pasando a considerase que les sos emplegaes continuen d’alta llaboral la empresa dende’l mesmu 14 de Marzu, ininterrumpidamente. Pel so llau, Aralia y Clece siguen ensin dar noticies, sumando ya dos meses nesta situación.

Les versiones apurries polos sindicatos UGT, USO y CCOO de parte de la empresa son delles y bien estremaes, lo que contribui a la incertidume de la plantiya. Na primera d’ella díxoseyos que na primer selmana de Mayu cobraríen lo adeldao de Marzu y a lo llargo’l mes del restu, ensin que por agora se produxeren talos ingresos. Na cabera, comunicóseyos que la empresa ta esperando a que l’alministración de solución a la situación xenerada pol retrasu na tramitación. La suspensión del ERTE implica que los contratos siguen en vigor y que la empresa nun recibirá dala indemnización por parte del erariu públicu, lo que nun ye óbice pa que la empresa cumpla colos sos compromisos, especialmente teniendo en cuenta que nes cláusules de la contratación incluise que la mesma tien la obligación de cuntar con una provisión de dellos meses de salarios colos que facer frente a situaciones comu l’actual.

Entantu, les emplegaes siguen ensin cobrar ya ensin saber cuandu cobrarán.

Nuria Prendes

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies