El Socialista Juan Cofiño declaró que ye “recurrente y cansino” pretender la eliminación del peaxe del Güerna, retractándose de lo prometío pol so partíu nos años 2004 y 2008
El peaxe del Güerna ye un de los principales pilancos al desendolcu del tresporte n’Asturies, y un de los motivos que ta llevando a les empreses tresportistes a abandonar el país camín de Madrid, Llión o Santander, llugares más competitivos pa exercer el so llabor. Esta autopista ye una auténtica barrera, ya que les condiciones de les otres salides a la meseta nun permiten el so usu seguru, continúu y masivu, polo que’l pidíu de que s’elimine’l peaxe ye costante na sociedá asturiana dende va décades.
Seique la fueya de ruta aprebada pola Xunta Xeneral l’añu pasáu incluyía la busca de métodos llegales que permitieren anular el contratu de concesión, el vicepresidente y conseyeru d’Infracadarmes insiste en que nes caberes eleiciones lo que llevaba el so programa yera namás l’estudiu de posibles “bonificaciones a los usuarios ” y en que sedría imposible consiguir l’anulación. Sicasí, n’España anularánse los peaxes d’un mínimu de 6 autopistes anantes de finar el 2021.
Redaición InfoAsturies
This work is licensed under a Creative Commons Attribution 4.0 International License.
