• Portada
  • >
  • Cultura
  • >
  • Nuevu casu d’Asturfobia por parte del “Principado” al pidir que se presente “toda la documentación en castellano”

Nuevu casu d’Asturfobia por parte del “Principado” al pidir que se presente “toda la documentación en castellano”

  • 27 Payares, 2018

El “Principado” vuelve a vese obligáu a reconocer qu’incumple la Llei d’Usu y Promoción del Asturianu al tar recoyíu nun impresu oficial de Servicios Sociales específicamente que “toda documentación deberá presentarse en lengua castellana

Nel milésimu incumplimientu de la llegalidá, un impresu oficial d’una convocatoria d’una conseyería del Gobiernu d’Asturies pidi, en mayúscules y en prietina, que nun s’utilice otra llingua que nun seya l’español, en clara contraposición a lo que dicta la Llei d’Usu vixente. Una vegada más pidin esculpies y confórmense con anunciar que “susanaránlo ceo”, ensin que l’incumplimientu reiteráu d’una llei tenga más consecuencies.

Nun va nin un mes que’l “Principado” tuvo que pedir públicamente esculpies a la muyer a la que se-y negó atención telefónica por falar asturianu y va menos d’un añu qu’un pa denunció que nel istitutu de la so fía nun se-y permitía presentar un escritu na nuesa llingua, lo mesmo que-y pasó a otru ciudadanu na Casa Conceyu de Sieru. En Noreña foi el mesmu conceyal l’atacáu por lleer una moción n’asturianu, y l’alcalde de Bimenes foi insultáu pol mesmu motivu. En marzu Renfe negóse esplicitamente a utilizar la toponimia oficial asturiana y l’añu pasáu Alimerka saltó a les noticies por prohibir a les sos emplegaes l’usu del asturianu pa dirixise a les veceres. A estos altores de cursu, polo menos 6 cientros de secundaria siguin ensin profesor de llingua y tovía la selmana pasada nun grupu contrariu a los drechos llingüísticos menaciábase de muerte a los asturfalantes, ensin consecuencies llegales.

Estos son namás dalgunos de los casos denunciaos (munchos d’ellos la traviés d’Iniciativa pol Asturianu) pero, comu en toles cuestiones nes que s’exerce la violencia sobre un coleutivu, la realidá ye que la gran mayoría nun se denuncien.

L’asturfobia ta presente’n tolos ámbetos, l’asturfalante carez acosu nel ámbetu llaboral, académicu, políticu y asociacional. La Llei d’Usu nun solo ye insuficiente, sinon que nun se cumple, nin siquier por parte de la mesma alministración que tendría que velar pol so cumplimientu. Pa los defensores de los drechos llingüísticos del asturianu, l’únicu camín que podría poner fin a esti pingar d’irregularidaes y ataques ye la Oficialidá.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

This site uses Akismet to reduce spam. Learn how your comment data is processed.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies