Marián Velasco, portavoz del PP en Noreña, desixó a Pablo Pérez, de Conceyu Abiertu por Noreña, que presentare la moción n’español. En llugar de face-y ver que taba agrediendo los drechos de Pablo, la alcaldesa en funciones lleó ella mesma la torna de la moción

La presentación d’una moción de Conceyu Abiertu sobro la prevención y llucha contra la lludopatía foi l’escenariu d’una nuea espirica na que se quiso imponer l’usu del español, torgando el natural usu de la llingua propia na presentación del proyeutu.

El voceru de Conceyu, Pablo Pérez, desplicó la moción n’asturianu, lo que prevocó la reación de la representante del PP, quien faciendo gala de la so ignorancia, afirmó nun lu pescanciar ya instolu a falar n’español «que es el idioma oficial de este Pleno», dando ensin querer cola solución del problema. La Oficialidá del asturianu ye l’únicu mediu pa finar darréu con esta triba de situaciones, permitiendo la llibre espresión a los asturfalantes y asegurando que quien acede a un cargu públicu pescancie siquiera l’idioma de les persones pa les que trabaya.

Anque Pérez, insistió en que lu amparaba’l drechu llegal a usar l’asturianu, la solución escoyía pola alcaldesa en funciones, Ana González, foi la de dar ella mesma llectura a la moción n’español, dexando “n’empate” l’alderique pero ensin defender la llegalidá.

Redaición InfoAsturies