La investigación sobre la agresión sufrida por Rubén Rosón y Jorge Fernández, militantes d’AMA Asturies, mientres les fiestes de San Matéu n’Uviéu entra nuna fase xudicial con una posible calificación de delitu d’odiu. El xefe superior de Policía Nacional n’Asturies, Jordi Ignacio Moreno, afirmó esti xueves que la investigación detectó dende l’entamu indicadores compatibles con esi tipu delictivu y señaló que, según l’atestáu policial, «la motivación inicial ye homófoba».

El rellatu policial, basáu en testimonios y grabaciones, sitúa l’aniciu de los fechos nuna caseta de Fiestes Populares. Según Moreno, un mozu intentó retirar una pancarta contra’l racismu y, dempués, volvió acompañáu por otros cinco pa arrancar un faldón cola bandera LGTBI. Cuando Rosón y Fernández salieron recriminándo-yos l’acción producióse l’agresión, con golpes y pataes. La Policía afirma tamién que se profirieron espresiones homófobes y proclames que’l responsable policial venceyó a la doctrina de grupos d’ultraderecha.

La Policía atribúi provisionalmente a cuatro de los seis investigaos posibles delitos de lesiones y odiu, y a otros dos únicamente’l d’odiu, pero esa ye una valoración policial pendiente de la calificación definitiva de Fiscalía y del xulgáu. Cinco de los investigaos fueron deteníos; el sestu atopábase fuera del Estáu por estudios.

El Xulgáu d’Instrucción númberu 3 d’Uviéu decretó esti xueves la llibertá provisional de los cinco deteníos con prohibición d’avera-se y comunicase coles víctimes. Fiscalía solicitara una distancia mínima de 200 metros y comparecencies periódiques; el xulgáu descartó estes últimes al considerar acreditaos el domiciliu y l’arraigu. El Ministeriu Fiscal atribúi de manera indiciaria dos delitos de lesiones y un delitu d’odiu, ensin que la instrucción tea rematada.

Les defenses nieguen esi componente ideolóxicu. Los abogaos de los investigaos sostienen que fueron Rosón y Fernández quienes dieron los primeros empuxones, califiquen lo asocedío como un incidente nocturnu y cuestionen que les imáxenes prueben proclames fascistes. Esa versión forma parte de la causa y tendrá que confrontase col atestáu, les grabaciones y los testimonios. La presunción d’inocencia sigue vixente y la calificación penal definitiva correspuende a los órganos xudiciales.

El casu llega dempués d’otros episodios de violencia denunciaos n’Asturies, como la agresión sufrida por un menor que llevaba una camiseta d’Asturies, un fechu que yá abriera l’alderique sobre la presencia de violencia ideolóxica nes celebraciones populares.

N’Uviéu, esti mesmu branu, la tensión alredor d’un recursu residencial pa menores tutelaos provocó una movilización vecinal contra’l racismu en La Florida y un debate más ampliu sobre racismu, aporofobia y construcción social de la peligrosidá.

La presencia y capacidá de movilización de organizaciones d’ultraderecha foi tamién oxetu de discusión pública, recoyida en pieces como l’análisis sobre’l puxu de discursos reaccionarios en conflictos sociales recientes.

Frente a esi clima, la respuesta ciudadana tuvo igualmente espresiones visibles, como la concentración que defendió que el racismu nun tien cabida nos barrios d’Uviéu. Nel casu de San Matéu, sicasí, la discusión pública entra agora nel terrén xudicial: hai una hipótesis policial y fiscal de delitu d’odiu, una versión defensiva que la refuga y una instrucción abierta que tendrá que determinar les responsabilidaes individuales.

This work is licensed under a Creative Commons Attribution 4.0 International License.