Xixón despide esti domingu la XXXV Fiesta de la Sidra Natural dempués de diez díes d’actividaes venceyaes a la cultura sidrera, col Mercadín de la Sidra y la Mazana como postrer cita de la programación.

El mercáu, instaláu nos Xardinos de la Reina, pon el ramu a una edición que combinó degustaciones, concursos d’escanciadores, actividaes culturales y promoción de la mazana y la sidra natural asturiana.

5.660 euros pa ELA Principado

La edición tuvo tamién una vertiente solidaria. El Día de la Sidra recaudó 5.660 euros pa ELA Principado gracies a la venta de 1.132 tiques, según los datos comunicaos por Divertia. La entidá municipal destaca la participación del públicu y la collaboración de los llagares.

La fiesta ye una de les grandes cites urbanes cola sidra y forma parte d’un calendariu nel que la cultura sidrera tien presencia en tol país. InfoAsturies vien siguiendo esti sector dende distintes perspectives, como la formación de nuevos sumilleres de sidra, la celebración del Día Mundial de la Sidra o la convocatoria del Sidracrucis 2026.

Una cultura que precisa coherencia

La proyección pública de la sidra nun ye solo una cuestión festiva: implica curiar la mazana, los llagares, la hostelería y la llingua na que se construyó esta cultura. InfoAsturies yá señaló en 2023 la contradicción de presentar el cartelu de la Fiesta de la Sidra Natural n’español, una decisión difícil d’entender nuna cita tan venceyada a la identidá asturiana.

El cierre d’esti domingu dexa como balance una participación amplia y una recaudación solidaria, al empar que recuerda la necesidá de tratar la sidra como patrimoniu cultural y actividá económica viva.

This work is licensed under a Creative Commons Attribution 4.0 International License.