La Casa de la Buelga de Ciañu, sede de la Cátedra de la Sidra d’Asturies, acoyó ayeri l’actu d’entrega de diplomes del II Cursu de Sumiller de Sidre – Panel de Tastia, entamáu pola Escuela de Sumillería de la Sidra de la Fundación Asturies XXI y desarrolláu nel CIFP de Hostelería y Turismu de Xixón.

La ceremonia punxo’l ramu a la segunda edición d’un proyectu formativu pioneru, nacíu cola intención de profesionalizar el conocimientu, la valoración y el serviciu de la sidre, nel que cabe destacar que les tres meyores notes del cursu correspondieron a muyeres, un resultáu que confirma’l creciente protagonismu femenín nos ámbitos profesionales y técnicos de la cultura sidrera. Pente les persones graduaes destacó tamién la presencia d’un menor d’edá, que completó esclusivamente la parte teórica de la formación.

La ceremonia contó con autoridaes llocales y representantes de la Fundación Asturies XXI, la Cátedra de la Sidra, el centru educativu y la DOP Sidra d’Asturies, amás del alumnáu, el profesoráu y persones venceyaes al sector.

El presidente de la Fundación Asturies XXI y director de la Escuela de Sumillería, Marcos Abel Fernández, aprovechó la clausura pa reclamar que la reconocencia internacional de la cultura sidrera se traduza en midíes concretes. «Tamos presumiéndolo muncho, pero hai poques coses concretes», señaló antes de recordar que los echadores y les sidreríes siguen ensin una reconocencia profesional específica.

Fernández denunció tamién la inexistencia n’Asturies d’estudios reglaos d’enoloxía y sumillería de sidre y llamó l’atención sobre’l déficit de mazana necesario pa cubrir el propiu consumu. Al so xuiciu, ye principalmente la sociedá civil la que ta sosteniendo y faciendo avanzar la cultura sidrera, con una contribución especialmente importante de los llagares caseros y les sos asociaciones.

Pela so parte, el presidente de la Cátedra de la Sidra d’Asturies, Lluis Benito, relacionó la figura actual del sumiller cola del tradicional ‘entendíu en sidre’. Recordó que’l conocimientu sobre la bebida vien tresmitiéndose dende muncho enantes de la existencia d’esta formación, que permite ordenar, completar y dotar de criterios técnicos esi saber popular.

El cursu formó al alumnáu n’análisis sensorial, procesos d’ellaboración, tipoloxíes de sidre, tastia a ciegues, serviciu, echáu y comunicación del productu. La segunda edición consolida asina una iniciativa que busca crear profesionales capaces de valorar y defender la sidre con rigor, ensin dixebrar la dimensión técnica del so fondu valor cultural.

This work is licensed under a Creative Commons Attribution 4.0 International License.