Trenta y dos ediciones lleva cellebrándose la Fiesta de la Sidra Natural en Xixón. Nesos años -que foron más de 32 por tar pel medio l’añu COVID- la llingua asturiana tuvo presente, de forma discreta pero continua, en tola cartelería del eventu. 

Esti añu la Fiesta, qu’entamó el 18 d’esti mes, presenta una cara estremada, marcada a dicir de munchos pola influyencia del alcuerdu de gobiernu Foro/VOX: por primer vuelta en más de tres décades, un cartelu escritu dafechu n’español, dende la toponimia a la llienda que tolos años recuerda que ye una folixa declarada “d’Interés Turísticu Rexonal”. Les casualidaes, en materia llingüística, nun esisten ya esta involución ye namás otru pasiquín atrás na sienda que’l bipartíu de dreches quier marcar pa esta ciodá, un camín qu’entamó a reblagos cola reaparición de la fiesta española de los toros en Xixón y que continúa cola desapaición del asturianu de la cartelería oficial. Habrá qu’andar sollertes, anantes de que la “Fiesta de la Sidra Natural” fine por ser la “Fiesta del vino español”. Al tiempu.

Alberto Rodríguez

This work is licensed under a Creative Commons Attribution 4.0 International License.