La primer edición va cellebrase’l 25 de setiembre en Xixón y va destinar el beneficiu netu a recuperar la producción de la IXP Quesu Los Beyos cola reapertura de la so quesería municipal n’Amieva.
Tierra Astur Sidrerías impulsa la primer edición de GastroPrau Fest, una nueva cita gastronómica, musical y cultural que tresllada al centru de Xixón el conceutu tradicional de la fiesta de prau. L’eventu va cellebrase’l vienres 25 de setiembre cola intención de poner nel centru’l productu agroalimentariu asturianu y amestar gastronomía, música, divulgación y compromisu col mundu rural.
La dimensión solidaria ye ún de los elementos principales de la iniciativa. El beneficiu netu del festival va destinase a sofitar la recuperación de la producción de la IXP Quesu Los Beyos, al traviés de la reapertura de la quesería municipal d’Amieva. La situación delicada d’esta producción convierte’l festival nuna ferramienta que, amás de promocionar la gastronomía, quier contribuyir a caltener actividá económica, crear oportunidaes nel territoriu y favorecer la permanencia de población nel mediu rural.
La propuesta gastronómica va axuntar productos de toles denominaciones d’orixe ya indicaciones xeográfiques protexíes d’Asturies, dientro de la marca Alimentos del Paradisu. Van tar presentes les DOP Afuega’l Pitu, Cabrales, Gamonéu, Queso Casín, Sidra d’Asturies y Vino de Cangas, xunto coles IXP Chosco de Tineo, Queso Los Beyos, Faba Asturiana, Miel de Asturias y Ternera Asturiana. A elles va sumase una representación importante de quesos asturianos y productores artesanos.
El quesu va ser precisamente una de les exes de la esperiencia gastronómica, acompañáu de distintos puntos de cocina en directo nos que van preparase ellaboraciones calientes a partir de productos con marques de calidá. GastroPrau Fest quier presentar les DOP y IXP non solamente como distintivos comerciales, sinón como ferramientes pa defender producciones venceyaes al territoriu, conocimientos tradicionales y una cultura gastronómica asturiana que depende directamente de la continuidá del campu y de los sos productores.
La música va tener tamién un papel destacáu na xornada. El programa recueye les actuaciones de José Manuel Tejedor, Algaire, Picarós, Antón Menchaca, Eva Hevia, Leirana y la Banda de Gaites Saxum, que van collaborar de manera altruista cola iniciativa. Dende la organización planteguen l’eventu como una celebración de calter familiar y abierta a distintes xeneraciones, recuperando l’ambiente social de les fiestes de prau y treslladándolu a un espaciu urbanu.
GastroPrau Fest va desenvolvese de 19:30 a 22:30 hores, con entraes a 39 euros. L’eventu ta promovíu y organizáu por Tierra Astur Sidrerías, col patrociniu d’Alimentos del Paraísu y Caxa Rural d’Asturies y cola collaboración del Conceyu de Xixón, El Comercio, SER Xixón y Picofino. La organización presenta esta primer edición como una iniciativa collaborativa, al estilu de la sestaferia tradicional, na que productores, instituciones, empreses y artistes ponen la so aportación al serviciu d’un oxetivu común: dar visibilidá y futuru al productu y al campu asturianu.
This work is licensed under a Creative Commons Attribution 4.0 International License.
